Basta aña kaba Frans Stuy tabata okupá ku oferta di trabou na hóben di poko perspektiva. Esei tabata na Amsterdam. Awor e ta purba na Rotterdam tambe. Hóbennan sürnam i antiano sin trabou por dal bai komo vigilante na su feria. Dje forma akí nan tin un kos di hasi i nan ta gana un tiki sèn tambe.

Frans Stuy, eksplotadó di atrakshon di kabaítu, ta duna di konosé ku gustosamente e ke brinda e hóbennan un perspektiva. "Mi sa ku hopi hóben no sa haña e oportunidat, awèl mi sí ke duna nan un chèns."

Stuy ta haña ku un hende mester lanta para pa yuda e hóbennan ei i ta p'e motibu akí e ta ofresé nan un djòp. Ademas, e ta preferá papia di hóben sin muchu perspektiva na lugá di problemátiko. "E problema ta surgi pasó nan ta bashí, si bo duna nan un oportunidat anto nan gana sèn, e problema ta disparsé."

 Inisio nobo

Un di e yònkumannan ku ta traha na e feria tin difikultat ku hañament'i trabou. Ya ta hasi mei aña kaba ku a kùr e af (50%), asina ta ku e no por kue djòp fásilmente. E ta konsiderá e trabou na feria komo un chèns pa superá su situashon. Probablemente esaki ta komienso di algu nobo. "Kisas mi ke sigui den e direkshon akí." Na trabou (un feria ku por kompará ku Coney Island-red) e ta paga tinu riba vários kos: e bishitante no ta pèrmití di kore rònt ku baiskel ni huma pitu ni molostiá hende tampoko.

Fakansidjòp

Un Antiano kolega di dje ta bai skol ainda asina ta ku p'é esaki ta un fakansidjòp. El a pasa trabou pa haña un kos di hasi i ta p'esei e ta kontentu ku awor e por traha na feria. "Tin bon ambiente sí, e gainan ta di mi edat i hopi di nan mi konosé kaba, nan ta biba den mi mes bario."

Arno Smit ta guia e hóbennan: "Te awor kos ta kanando sin problema, mester mira nan trabou mas bien komo yudansa adishonal pa e ehekutivonan di seguridat."

Smit ta bisa ku por ta tin hóben ku ta haña e trabou akí asina dushi, ku nan ke sigui kune. Frans Stuy en todo kaso lo sigui su rumbo. Pronto lo e bin ku algun evento mas. E tin intenshon di hasi uso atrobe di servisio dje hóbennan.