Mester siña adulto ku ta traha ku mucha ta ki señal e chabalitunan ta uza, ora ta abuzá seksualmente di nan. Minister Arthur Dowers di Hustisia ta bisa e kos akí. E no ta kere den kastigu mínimo pa e malechornan.

Ultimamente abuzu di mucha ta tópiko di dia na Aruba. Mama di dos mucha muhé yòn ku konosí di su famia a mishi kune, a kuminsá ku un akshon pasobra e ta indigná ku e indiferensha di outoridatnan hudisial. El a kompilá 11.000 firma pa un petishon kaminda ta pidi kastigu mas severo pa esnan ku ta abuzá di mucha.

No ta adekuá
Dowers ta atmití ku no ta tur ora bai ta atendé di un forma mes adekuá. E ta prekupá tambe ku e riesgonan ku muchanan ta kore ku lo por abuzá di nan. 'Nos sa en todo kaso ku tin desenas di kaso ku sí a keda atendé satisfaktoriamente den bista di komunidat' asina Dowers ta bisa.

E sa ku tin sentenares di hóben ku ta kore riesgo. Ta pesei el a pidi UNESCO pa investigá 'kon ta pará ku mucha rubiano' pa por haña un bon bista di e riesgonan ku nan ta kore.

Mester por papia di insesto
Pa mayoria di rubiano te ainda ta difísil pa papia di sèks i di insesto. Segun minister Dowers papiamentu tokante insesto ta un tabú, no soalmente na Aruba. Ta pesei mester eduká hende ku ta traha ku mucha manera mener i yùfrou di skol. trahadó sosial, pa nan siña rekonosé abuzu mas lihé. E ora ei por intervení mas lihé. E tin un remarka sí : Mi ta sali for di e punto di bista ku insesto lo keda un tema ku difísilmente nos ta papia di dje'.

E mama di e akshon di firma a kibra e tradishon di keda sin bisa nada pasó e tin bèrgwensa, i a papia di abuzu di su yunan. Un hòmber di edat tabata mishi ku su yu muhénan ora nan tabata keda serka nan wela. E mama en kestion tabata indigná, partikularmente ku e manera ku outoridatnan a atendé ku e kaso.

Koutela
Dowers ta bisa ku pa hustisia ta difísil pa nan kumpli ku deseo di familiar di víktimanan di abuzu di mucha. Outoridatnan mester tene nan mes na regla i anda ku koutela. Pero víktimanan òf nan famia ta fèrwaktu hopi biaha un reakshon lihé i un huisio promé ku e proseso mes a tuma lugá.'

Esaki por okashoná algun frustrashon den komunidat, asina e minister ta bisa. 'Kisas nos tin e tarea di duna informashon na komunidat ta kiko presis ta e posibilidatnan ku un instansha hudisial tin.'

Kastigu mas severo
E kastigunan pa malechor di abuzu di mucha ta meskos na Hulanda i Aruba. Lei di Antia hulandes konosé kastigu mas pisá pero den práktika ta apliká kastigu na mes manera ku na Hulanda. Minister Dowers ta bisa ku e no ta konvensí ku kastigu mas haltu òf kastigu mínimo ta e solushon. Loke nos mester hasi ta prevení. Hopi biaha tin hopi señal den un komunidat ku por sòru pa protehá mucha kontra abusadornan. Kisas nos mester hasi mas uzo di esei.'

Skucha un entrevista na hulandes di Dilma Arends