Lo implementá e sistema di enseñansa hulandes na Islanan BES (Bonèiru, Sint Eustatius i Saba) pa dje manera ei mehorá kalidat di enseñansa na e islanan. Fleur Lagcher, prekursor pa ministerio di Enseñansa hulandes ta bisa esaki den kuadro dje kambionan ku lo bai tuma lugá ora e islanan BES bira munisipionan ekstraordinario di Hulanda.
 
Enseñansa ta un dje prioridatnan den e periodo di transishon dje islanan. Fin di 2008 Inspekshon di enseñansa hulandes a traha un rapòrt tokante enseñansa na e islanan BES. For dje rapòrt a sali na kla ku por mehorá enseñansa na Islariba riba diferente punto. "A disidí pa implementá e sistema di enseñansa hulandes, pasobra esaki tin e mihó puntonan di referensha pa mehorá enseñansa", segun Lagcher.
 
Dos prekursor pa BES
Ministerio di Enseñansa tin dos prekursor na e islanan ku ta prepará e kaminda pa e kambionan riba tereno di enseñansa. Ya riba término kòrtiku mester tuma diferente paso pa mehorá kalidat di enseñansa na Islanan BES. Lagcher: "Nos ta kumprando diferente material di lès i ta deshasiendo dje retrasonan di estudio. Un otro paso konkretu ta rekapasitashon di maestronan pa nan bira guia interno", asina Lagcher ta bisa.
 
Hulandes komo lenga di instrukshon
Na sierto momentu tabata reina e pensamentu ku Hulandes lo bira lenga di instrukshon na e tres islanan. Segun Lagcher ta importante pa dediká mas atenshon na Hulandes den enseñansa di Fundeshi. "Hulandes ta keda pa Boneiru e lenga di instrukshon, pero ei mester intensifiká e atenshon. Meskos ta konta pa Sint Eustatius. E skolnan mes por determiná si lenga di instrukshon ta bira Ingles òf Hulandes, basta nan sòru pa e Hulandes ta na òrdu pa enseñansa avansá. Pa Saba tambe ta konta ku Hulandes mester haña atenshon den enseñansa di Fundeshi."
 
Hopi skol na Hulanda ta keha ku kada bes ministerio di Enseñansa ta bin ku regla nobo. E sensibilidat akí ta hunga un ròl èkstra na e islanan. "Si ta trata di un programa di mehorashon, nos lo hasi esaki huntu ku bestürkolezje i hendenan na e isla. Nos ta purba informá tur hende bon di e plannan i skucha e siudadanonan. No ta e intenshon pa nos ta bai imbentá kos ku no ta funshoná aki."
 
Skucha relato di René Roodheuvel