Meskos ku mucha hòmber mucha muhé por tur kos. Pero hopi bia mucha muhé no ta desaroyá nan kapasidatnan kompletamente, pasobra nan ta víktima di sistemanan di edukashon tradishonal. Muchu be nan mester tende ku na no por ta meskos ku mucha hòmber. Nan por hasi Servisio Militar Sosial Formativo? ‘Kompolaga’, komandante Raul de Windt di Brigada pa Seguridat i Formashon (BSF) ta bisa.

A lanta BSF seis aña pasá pa vigilá durante aktividatnan sosial. Hoben entre 15 i 25 aña ta haña un training i formashon mental semimilitar. Por ehèmpel BSF ta pèrkurá pa seguridat di mucha i hoben durante karnaval. E mucha muhénan den BSF no ta mira SVD positivo. Dikon? Pasobra nan tin miedo di e enfoke fuerte.

Trénen
Erlyciën Bito tin diesseis aña i tin ocho luna den BSF kaba. E training i formashon mental semimilitar a bai e bon. “Antes mi tabata agresivo i mi tabata rabia lihé. Awó mi a siña kon trata ku mi emoshonnan. Mi ta mas trankil awó.”

E ta haña ta un bon idea si mucha muhé tambe por bai SVD. Awó SVD ta pa mucha hòmber so, segun un areglo legal. Mucha hòmber ku a drop-out ta haña formashon sosial den un kuadro militar. Bito: “Ta bon pa mucha muhé tambe. E ora ei bo por mira ku no ta mucha hòmber so por tin un karakter fuerte sino mucha muhé tambe.”

Deborah Miguel (17) ta di akuerdo ku Bito. Mucha muhé ku a pasa den un mal temporada por lanta nan bida bèk den kazerne. E mucha muhénan lo krese, siña disiplina i bira adulto.”

Pero personalmente Bito i Miguel tur dos tin duda si SVD ta algu ku nan por pasa aden. “E trainingnan ta pisá, mi no ke fòrsa. Na brigada mi ta sintimi bon. Nos ta train un be pa siman riba djasabra i esei ta sufisiente”, Miguel ta bisa.

Indoktrinashon
Den BSF tambe e mucha muhénan i mucha hòmbernan ta haña un formashon semimilitar di komandante Raul de Windt. E ta polis ekstraordinario i ta duna lès di tira, outodefensa i formashon mental na skol di polis. Pa gana mucha muhé pa pasa den un formashon militar manera SVD, mester bini un kambio di mentalidat, De Windt ta haña.

“E komunidat aki ta indoktriná nos yunan: sierto tarea no ta pa mucha muhé i ta siña ku mucha muhé ta suak. Esaki no ta berdat. Mucha muhé por tur kos, meskos ku mucha hòmber. E training mental ta importante. Bo pensamentunan ta forma un emoshon i for di esaki bo ta tuma un desishon. E desishon ta bira un akshon. E kustumbernan ku resultá for di esaki ta forma bo karakter. E ora ei bo por logra tur loke bo ke logra.”

Eskoho
Raul de Windt asta ta haña ku un formashon sosial militar no mester tuma luga te ora e hóbennan a bira drop-out kaba. De Windt: “Nos no mester warda te ora yega asina leu. Banda di e servisio militar sosial formativo mester tin mas posibilidat pa formashon. Mayornan mester por skohe pa laga nan yunan sigui un formashon asina banda di nan estudio.

De Windt ta bisa ku un formashon semimilitar semper ta bon pasobra hobennan ta siña disiplina, rèspèt i responsabilidat. “Asina nan ta bira persona fuerte den komunidat. E ora ei nan ta sufisiente efisiente pa logra algu den nan bida.”