Ruchella di Kòrsou di 16 aña ta mama di dos yu i e ta HIV positivo. E tatanan di su dos beibinan pa edat lo por tabata su mes tata, pero pa Ruchella i su mama esei no ta un problema: e ‘sugar daddy’nan’ ta nan ta paga resibu di Aqualectra i ta yuda nan sobrebibí.

Ruchella no ta un eksepshon. Tur aña desena di mucha muhé bou di edat ta kai den gara di hòmbernan adulto ku ta mantené nan – i nan famia – en kambio di sèks. E kantidat ei ta oumentá ‘espantosamente’ segun organisashonnan di ayudo.

Fenómeno ‘Sugar daddy’
Aña pasá Federatie Antilliaanse Jeugdzorg (FAJ) a registrá shete kaso di mucha muhé bou di edat ku tabatin relashon seksual ku un hòmber mas bieu. Den dos kaso tabatin aprobashon di e mama. “Esei ta e kasonan ku kasualmentre nos a haña sa, òf ku a keda raportá dor di adultonan preokupá.

Den realidat e kantidat ta hopi bes mas haltu”, di akuerdo ku koordinadó di FAJ Alex Walle. Den mayoria di kaso no ta hasi denunsia pasobra e muchanan ta haña ku ta normal i e mamanan tin pas ku esei, pasobra nan ta mira e hòmber komo e salbashon finansiero.”

E tipo di hòmbernan akí ta konosí komo ‘sugar daddy’. Nan ta ‘yuda’ e muchanan ku karchi di telefòn, paña nobo i nan ta paga e resibunan. Pero en kontra tin un preis hopi haltu, sèks i hopi bes sèks den grupo” segun Corah Kooistra, presidente di Fundashon kontra Abusu di Mucha.

Grupo di riesgo
E tipo di mucha muhé ku ta kai den gara di sugar daddy, ta bini segun Walle mas bien for di famia di un solo mayor ku ta finasieramente mal pará.’ “Na kas nan ta haña poko atenshon i hopi bes nan tin un pensamentu i estima no muchu haltu di nan mes.

Si pasa un hòmber ku ta duna nan kòmplimènt i un bon trato, nan ta kai pa nan. Na kas nan ta haña apresio tambe pasobra nan amigu nobo ta yuda solushoná e problemanan finansiero.” Walle ta añadí ku e ‘situashon mental di e muchanan akí i nan mama ta hopi frágil. “Ta trata hopi bes di mucha muhé ku limitashon intelektual òf mucha muhé ku ta na skol no ta presta dje bon ei òf ku ta mustra un komportashon indeseá i ku nan a kita for di skol.

Tambe e mamanan di e mucha muhénan hopi bes tin limitashonnan intelektual dor di falta di skol i formashon sosial i pa e motibu ei nan lo no por duna nan yu muhé e guia korekto.”

Tarea di gobièrnu
E sugar daddy ku Ruchella i su famia a kai den su gara segun Kooistra ta forma parti di un grupo di hòmber ku aktivamente ta buskando mucha muhé menor di edat pa maluzá nan seksualmente’.
Hasiendo investigashon i puntrando polis eseinan ta revelá, ku polis ta na haltura, pero nan no por hasi muchu kos si no hasi denunsia’.

Segun instansianan ku ta duna yudansa un tarea importante pa gobièrnu. “Mester bini protokòlnan kla pa dosente i polisnan di den bario tokante kon ta trata ku e asuntunan akí. Mester bini tambe mas edukashon sosial i finansiero pa famianan di un solo mayor”. I last but not least’ segun Kooistra: “komunidat no mester aseptá sugar daddynan mas, i sali un biaha pa hubentut di Kòrsou.”

- E nòmber di bèrdat di Ruchella ta konosí na redakshon -