Porfin a logra lokalisá un skatsdó baké di Antia: Marlon Wawoe!
Na edat hóben el a siña skats serka Tom Groot, kampion hulandes i awor e ta un skatsdó talentoso i ta bende skats tambe den un nogoshi yamá 'Aqua Diving' na Amsterdam.

Marlon Wawoe a siña skats for di chikí, pa ser eksakto na edat di 3 aña. El a bai biba serka su tanta na Hulanda ku tabata kasá ku Tom Groot, kampion ulandes di skatsmentu. Tom Groot a siña Marlon skats. Wawoe: "Esei tabata un tempu masha bunita mes, pasobra m'a bin for di Kòrsou komo mucha chikitu, anto bo ta bin den un temperatura totalmente diferente, anto esei ta pone ku...ya, bo ta haña un otro sentido pa natuur.."

Eis natural ta duna un kick
Wawoe a studia na akademia di moda na Hulanda, pero su afishon ta skatsmentu. E tin hopi saber di skats. E por splika hende perfektamente kiko mester hasi kontra friu, i kua ta e tipo di sapatu mas adekuado pa usa ora di skats. E ta bon den dunamentu di konseho i rekomendashon. Kos ta bayendo bon ku nogoshi, kasi tur skats a bende kaba.

Marlon Wawoe ta preferá skats riba eis natural: "E ta duna un sorto di kick ku ta difísil haña riba un ban. Riba un ban kétubai bo ta riba un serkel. Riba eis natural bo ta mira mata, naturalesa, tur esei ta hopi bunita i ta duna un èkstra kick."

Elfstedentocht
Na Hulanda tur fanátiko di skats ta pendiente di un eventual Elfstedentocht, e kareda maratóniko riba eis natural, e gira glasial ku ta atravesá kanal i lagonan kongelá na 11 siudat den nòrt di Hulanda. E kareda akí ta ofresé skatsdónan baké e oportunidat di destaká, pero Wawoe no ta dispuesto di aseptá e reto. Si yega asina leu ku ta organisá Elfstedentocht, lo sera e negoshi pa bai wak e buelta riba eis natural na televishon, asina Marlon ta konta. E ta un fanátiko di skatsmentu, pero un Elfstedentocht sí no ta algu p'e. "E klima na Hulanda no ta duna e posibilidat pa trein tur aña riba eis natural, esei ta e problema."

Ban skats ku Marlon
Hopi biá ora Wawoe ta skats, nan ta keda wak e: 'hey, un strañero riba eis'...segun e ta un kos ku tin ku kambia, pasó ata tin asta un presidente pretu, Obama..! E ta ripará ku ta masha tiki Antiano, Arubano i Sürnam sa subi eis. No sa sosodé mashá tampoko ku hendenan di 'kultura kayente' ta kumpra skats.

Marlon Wawoe ta hasi un apelashon na yunan di tera pa hasi mas ku e deporte aki. Tur hende ta bonbiní na su tienda pa konseho í: e ta dispuesto na traha un sita pa bai skats ku esnan interesá!