Maneho finansiero di Sint Maarten te ainda ta laga di deseá. Asina sekretario Geert Bergsma di Kolegio di kontròl finansiero (Cft) a skibi den un karta pa promé minister demisionario Balkenende. Den e karta Bergsma ta bisa di ta masha prekupá ku 'progreso riba tereno di maneho i atministrashon finansiero' na e isla, ku entrante 10-10-10 ta haña státùs di pais outónomo den Reino. Un situashon finansiero sano ta un di e kondishonnan mas importante pa por haña e státùs.

No tin presupuesto

En general e situashon finansiero di e islanan antiano a mehorá, en parti debí na kòntrol di Cft. Ta Sint Maarten so ta keda pa basta tempu kaba un isla ku ta duna motibu pa ta prekupá kuné. Cft ta skibi por ehèmpel ku for di kuminsamentu Sint Maarten tabatin problema pa duna informashon kompleto i na ora. Bergsma ta ferwaktu tambe ku trahamentu di presupuesto pa aña 2011 lo resultá problemátiko.

Pa parlamentario Ronald van Raak di SP, e di tantísimo atvertensia pa Sint Maarten no ta nada straño. Nunka van Raak no a kere ku por logra e státùs outónomo pa Sint Maarten dia 10-10-10. 'Mi a yega di yam'é kaba un pais bashí pasó hopi kos lo no ta na òrdu. Pero si e finansanan no ta na òrdu anto e ora ei no tin un pais mes.'

Outo a dal kontra muraya
Van Raak ta tuma gobièrnu hulandes i mandatarionan di Sint Maarten na malu ku nan a sigui tòg ku preparashonnan pa un isla outónomo. 'Nan a bai dal konsientemente ku e outo kontra muraya.' Mi ta haña esei bobo i mi ta tuma nan na malu.' Pasobra turesten ta Hulanda ta paga saneamentu di debe sí sin ku e presupuesto ta na òrdu, asina Van Raak ta bisa.

E parlamentario di SP ke pa posponé e fecha di 10-10-10 ainda pa Sint Maarten i e ke para saneamentu di debe te ora ora ku maneho finansiero ta na òrdu i otro asuntu manera polis ta kla. 'Promé mester konstruí, djei ta pone bandera den tòp.' Awor ku e supervisornan ta bolbe atvertí, Van Raak ta spera ku gobièrnu lo por yega na kambia su posishon.

Kohe kabes abou
Sint Maarten lo bai resultá aweró bou di kuratela di Hulanda pasó entrante 10-10-10 Antia ta stòp di eksistí. 'Lo no por tin un pais Sint Maarten. Pais Sint Maarten lo no por bira realidat. Sin presupuesto bo no tin pais'. 'Gobièrnu i mandatarionan di e isla mester informá pueblo onestamente', Van Raak ta komentá. 'A kohe nan kabes abou'. E ta kere ku solushon di e problemanan lo bai kosta Hulanda basta sèn.