Ultimo tempu un grupo di mama i alabes boluntario antiano tabata atendé eksitosamente ku e problema di molèster ku mucha di kaya na Katendrecht, un di e distritonan di Rotterdam. Base di nan éksito ta e manera ku nan a logra gana konfiansa di e hóbennan problemátiko di desendensha antiano. E mamanan ku ta traha komo boluntario den bario, a organisá vários aktividat den un sentro hubenil, pero resientemente outoridatnan di Katendrecht a disidí di para supsidio di nan proyekto.

Próksimo i Optima Forma ta dos proyekto ku ta kanando. Munisipio a para supsidio pa Optima Forma, un proyekto di SWA, e fundashon pa promové bienestar di Antiano i Arubano. Awor SWA no por sigui mas ku e proyekto.

Eldrid Henriquez ta un di e boluntarionan. E ta kere ku e motibu dikon a para dunamentu di supsidio ta ku a usa e plaka pa otro kos, na lugá di yudansa. E ta haña tambe ku asina akí hubentut ta bolbe subi mal kaminda i ku kriminalidat a bolbe oumentá. Droga a kuminsá sirkulá atrobe den seno di hubentut. Vários hóben no ta bayendo skol mas tampoko. Henter e asuntu tin e bastante prekupá.

Tur esaki siendo ku tabata bayendo basta bon atrobe na Katendrecht te ku zomer di aña pasá. E mucha yònnan ke pa e proyekto sigui, ya ku nan no tin un lugá mas, kaminda nan por reuní. Semper tabatin hende dispuesto na yuda i guia nan.

Pregunta di SP
Partido SP a hasi pregunta awé den konseho munisipal tokante paro di supsidio. Eldrid Henriquez ta mashá kontentu ku esaki. "Sikiera tin un hende ku ta skucha pueblo antiano." No ta hóbennan antiano so ta laga na kaya na Katendrecht, pero tambe e Dominikanunan ku apénas ta papia ulandes i ku no sa mas unda nan akudí. "Nan no por atendé nan asuntunan nan so. Ta henter Katendrecht ta keda mal pará."