Dia 10 di òktober 2010 lo disolvé Antia ulandes. A palabrá e fecha akí den e reunion di e grupo di guia polítiko di fin di sèptèmber. Raymond Labad di Movimentu Antiano i Arubano pa Promové Partisipashon (MAAPP) ta haña ku no mester surgi demora mas den e proseso di disolushon di Antia.

Sekretario di estado Ank Bijleveld di Relashonnan den Reino ta bisa ku ainda a keda hopi kos pa hasi, sobretodo riba tereno di legislashon. Pero segun Labad ta importante ku a pone fecha awor. "For di 2007 lo a desmantelá Antia. Kada be tabata posponéle. Retraso no ta kumbiní niun hende."

Di otro banda Labad ta bisa ku trabou purá purá tampoko no ta bon, pasobra e ora ei por kometé eror. E ta kompar'é ku e proseso di independensha di Indonesia i di Sürnam, ku a kana poko difísil. Reformashon di Reino ta di kompará kune: "No pa Antia i Aruba so, pa Hulanda tambe."

Tuma desishon
E sosten menguante na Hulanda i e desaroyonan na Antia, manera próksimo elekshon pa Staten di yanüari 2010 i e referèndem na Boneiru, no mester influenshá e palabrashonnan mas, segun Labad. "Niun hende no sa kiko lo sosodé despues di elekshon pa parlamento ulandes di 2011. Mi por imaginámi ku gobièrnu ke tuma desishon for di awor."

Niun hende no ke bolbe kuminsá negoshá òf para e proseso, segun Labad. "Palabrashonnan hasí mester supsistí den e gobièrnunan siguiente."

Skucha Raymond Labad