Partidonan gobernante i oposishon na Antia ulandes i Aruba mester uni forsa pa purba blòkia futuro lei pa tráfiko di persona den seno di Rèino. E apelashon urgente akí ta bin di Raymond Labad, presidente di MAAPP, e movementu pa partisipashon polítiko di Antiano i Arubano na Hulanda.

Den e lei di estado pa tráfiko di persona a stipulá entre otro ku por saka un Hulandes for di otro parti di Rèino i ku e no tin mag di pone pia nunka mas riba suela di e parti di Rèino konserní.

Un paso atras den tempu
MAAPP ( Movimentu Antiano i Arubano pa Promové Partisipashon) ta bai investigá tur posibel opshon huntu ku otro organisashon di interes komun na Antia i Aruba pa evitá implementashon di e lei estatal tan repudiá. Segun presidente Labad e Lei di Rèino pa Tráfiko di Persona ta nifiká un paso atras den tempu. “Si nos mira e splikashon ta bisa ku 'Rijkswet Personenverkeer' no ta un areglo estilo Verdonk, ma en prinsipio e ta meskos. Nos ta apsolutamente kontra i pues nos ta hasi un yamamentu na un i tur na Antia i Aruba, tantu koalishon komo oposishon, pa uni forsa", asina Labad ta konta.

Denter di dos siman MAAPP ke sinta na mesa ku eksperto pa studia konsepto di e lei i pa wak ki paso mester tuma pa para su implementashon. Ademas, implementashon di e lei por tin efekto riba Antianonan ku ta biba kaba na Hulanda. Partido polítiko  Pueblo Soberano ta konsiderá e lei di estado komo ‘apartheid’, pero Labad no ke kalifik'é komo tal. “Dje leu ei lo mi no ke bai. Pa mi e no ta segregashon, pero aseptabel sigur sigur e no ta.”

Lo uni forsa
MAAPP ta desididu pa hasi tur loke ta na su alkanse pa wanta e lei akí. “Nos tin kontakto regularmente ku polítikonan na Hulanda. Fuera djesei nos lo tuma kontakto ku organisashonnan hermana manera PPAAA (Platform Politici van Antilliaanse en Arubaanse Afkomst) i OCaN (Overlegorgaan Caribische Nederlanders). Na Hulanda nos ta uniendo forsa loke mester sosodé na Aruba i Antia tambe. Na Aruba a konvoká reunion di Konseho di Minister di Rèino pa djabièrnè, 28 di ougùstùs. Aya tambe ta kuestioná e lei akí mashá i nos ta spera ku huntu nos por sera moketa.”

MAAPP lo hasi tur esfuerso pa defendé derechi di kada Hulandes.