Tradishonalmente músika karibense i latino ta pará sentral na Fiestanan Antiano na Hoogstraten na Bèlgika. Dia 14 i 15 di ougùstùs bishitantenan di e festival por gosa plenamente di entre otro salsa, merengue, cumbia i zouk.

E organisadó Lode Verschueren ta haña ku atrobe el a hinka un programa nèchi den otro. "Ta un programa úniko ku hit di tur genero di músika." E ta masha kontentu ku presensha di Carlos Vives, Kassav' i Tego Calderon. "Mi tin 15 aña ta desea pa Carlos Vives bin partisipá." For di Antia i Sürnam e bandanan Aptijt i Youth X-treme lo tei.

Músika Karibense
Fiestanan Antiano no ta limitá nan mes na Antia Hulandes. Henter Karibe ta representá musikalmente. Anke Bèlgika no konosé un historia kolonial den Karibe, bishitante di henter Oropa gusta bini Hoogstraten, ku ta keda djis pasa frontera hulandes. "Nos no ta parsial ku grupo", segun Verschueren.

E organisadó no tin miedu ku lo bini menos bishitante pa motibu di e krisis finansiero. "Nos tin hopi konfiansa den nos públiko. Nan no ta keda sin bai un festival kon ke, mas bien nan lo keda sin kumpra un karson nobo." E ta ripará si ku seka e bandanan tin hopi ánimo pa bin toka. Tin hopi interes pa presentashon 'live'. Aworaki esaki ta kasi e uniko fuente di entrada pa bandanan. Fiestanan Antiano na Hoogstraten ta eksistí for di 1983. E ta un di e festivalnan karibense mas grandi na mundu.