Si ta na Lista di Kambio - e union dje tres partidonan di oposishon na Kòrsou (MAN, Forsa Kòrsou i NPA) - elekshon di Staten pa Antia dia 22 di yanüari ta bai tokante 'kambio'. Lista di Kambio ta entablá bou di guia di lider di MAN Charles Cooper e lucha ku e oponente di mas grandi, PAR di promé minister Emily de Jongh-Elhage. Di antemano a eskluí koperashon ku e partido ei.

Ta trata dje delaster elekshon di Staten pa Antia. Koalishon di gobièrnu tabata ke promé pa prolongá e periodo ku Staten aktual ta sinta. Aparte dje koalishon na Kòrsou, partikularmente e tres Islariba no ta sinta warda elekshonnan nobo. Komo ku 10-10-10 ta e fecha stipulá pa desmantelá pais Antia i e sinku islanan lo bai kada unu nan propio kaminda den Reino.

Oposishon na Kòrsou a forsa elekshon serka Konseho di Asesoramentu (Raad van Advies). E resultado a determiná e progreso dje reformashonnan estatal. Koalishon ke sigui mas lihé posibel ku e proseso di reformashon di Antia, pero na Kòrsou i tambe na Boneiru tin otro partidonan ku total otro prioridatnan.

Nesesidatnan di pueblo
Lista di Kambio a laga hasi un propio investigashon pa sa kiko ta e nesesidatnan di pueblo i a sinkronisá su programa di elekshon riba esaki, asina Charles Cooper ta konta durante un rèli di kampaña na Tera Kòrá na Bandabou. Struktura estatal ta te na di sinku lugá serka siudadanonan, asina a sali na kla for dje investigashon. E kosnan ku ta mas importante ta kosto di bida, enseñansa, korupshon, mal maneho i kriminalidat. Pa e motibu ei 'Kambio' ta loke ta mas importante pa Lista di Kambio.

Tur kos otro
Tin kayanan na Bandabou tur na banderanan blou. Bastante hende ta sostené e deseo pa kambio, sin ku nan ta konkretu: 'tur kos mester kambia'. Despues di diesseis aña 'ta basta ku PAR', basta ku e partido hel. Awor tur kos mester ta blou, asina hendenan ta bisa ripitiendo Charles Cooper ku ta kana den e kayanan ku un grupo basta grandi di partidarionan.

Cooper ta kere ku pueblo di Bandabou lo sostené Lista di Kambio, pasobra MAN a gana na Bandabou durante e delaster tres elekshonnan. Un hende muhé ta atvertí Cooper ku delaster siman e no mester hasi niun eror "paso ta sea kai òf lanta para'. Esaki ta muestra dje tenshon eksistente relashoná ku elekshon. E señora ta kritiká PAR tambe ku tin atenshon só pa sierto gruponan den komunidat i no ta fókùs riba poblashon total.

Charles Cooper ta kana i ta tuma su tempu pa diskutí ku siudadanonan na Bandabou. Asina el a papia ku un hòmber ku ta haña ku Kòrsou ta muchu chikitu pa no haña ayudo di Hulanda. A kambio di esei por ta masha bon ku Hulanda ta supervisá, asina e hòmber ta haña. Pasobra den pasado hopi plaka a disparsé den un pos sin fondo.

Asko di Hulanda
Tur kos ta bon, segun opinion di Cooper. Pero ta trata di e kondishonnan bou di kua bo ta duna e ayudo ei. E ta ninga ku e tin asko di Hulanda. PAR a inbentá esei. "Bo ta bai vota pa nos', asina e ta puntra ku speransa na final dje kombersashon. "Mi no ta primintí nada, pero nos a yega poko mas leu', asina e hòmber ta kontestá.

E palabrashonnan ku Hulanda tokante e kambionan estatal no ta prioridat mas importante pa Lista di Kambio. E ponensia ku e kambionan estatal ta 'non-issue' pa Lista di Kambio ta bin for di seno di PAR, asina Cooper ta bisa. E fecha di 10-10-10 ta p'e tambe e fecha stipulá.

Re-negosashon
Pero ta trata si di kalidat di outonomia. I esei tin di aber ku e proposishonnan pa e diferente leinan di reino ku parlamentunan ta trata awor. Pa Lista di Kambio e proposishonnan ta bou di nivel. Pesei Lista di Kambio ke re-negoshá, pero pasobra e saneamentu dje debe di miares pa Hulanda ta ya kaba stipulá pa lei, no ta tornu mas na esaki.

Cooper no tin miedu pa posponementu relashoná ku re-negosashonnan, apesar dje atvertensha di entre otro promé minister Balkenende ku Antia mester hasi lihé relashoná ku diferente motibunan polítiko na Hulanda i Antia. I si Hulanda no ke, nos lo topa otro serka Nashonnan Uní, asina Cooper ta bisa, pasobra 'pueblo ta disidí'.