E popular kantante kompositor yu di Kòrsou Levi Silvanie ta sigui kosechá fama despues di su éksito grandi "Mi ke ta mi mes". Aktualmente e ta hasiendo un gira na Hulanda yamá 'A different tour'. Próksimamente lo e presentá na North Sea Jazz Kòrsou i fin di òktober e ta lansa su debutalbum.

E tour di Silvanie a kuminsá for di 15 di yüli pa bai terminá dia 2 di sèptèmber den su presentashon na North Sea Jazz di Kòrsou. Silvanie ta splika ku loke ta hasi su gira diferente ta e presentashon akústiko i mas íntimo pa grupo di por lo menos 15 te 35 hende.

Normalmente amantenan di músika, ku ta akudí na festival òf konsierto no por aserká nan ídolo fásilmente, 'semper djaleu', pero ora presentashon ta na eskala chikí sí por papia i interkambiá di idea ku e kantante òf integrante di banda musikal. Asina públiko por sera konosí ku nan efektivamente.

E echo ku Levi Silvanie ta partisipá na NSJ na Kòrsou a bin di sorpresa i, manera e mes ta bisa ta 'mas ku un dream come true', pasobra e ta realisá su mes ku aki ta trata di un festival mundialmente rekonosé i 'ta algu sumamente grandi: kompartí podio ku Sting, Stevie Wonder i Earth, Wind and Fire, artistanan ku a insiprámi, pa ami ta un onor!'

E dianan akí Silvanie ta finalisando su debutalbum den studio pa lans'é final di òktober.