Parlamentario John Leerdam, miembro di partido PvdA, ta bandoná Tweede Kamer. E ta konsiderá ku el a pèrdè kredibilidat despues di loke el a bisa den entrevista ku un hóben reportero di radio 3FM na Hulanda. Den programa di Giel Beelen, Leerdam a reakshoná riba e istoria inventá di un terorista no eksistente, ku a sali liber promé ku tempu na Hulanda, debí na un eror di forma di OM. E parlamentario i èks direktor di teater a bai tambe tras di supuesto ekspreshon di èks promé minister israelí Ariel Sharon tokante Siria, siendo ku Sharon ta den koma basta aña kaba na hòspital.

"Konsekuenshanan di mi reakshonnan ta pone ku mi no por funshoná mas komo miembro di parlamentu hulandes'', segun Leerdam den un deklarashon ku a manda por eskrito djárason anochi. E ta duna di konosé ku den e entrevista el a 'laga nan papi'é pa deklará kos ku no solamente a afektá su kredibilidat, sino tambe esun di Tweede Kamer den su totalidat i di su partido'.

Diederik Samsom, dirigente nobo di PvdA a reakshoná riba e suseso bisando ku desishon di Leerdam ta 'difísil, balente i sensato'. "Ta mas ku klaro ku bo no por funshoná digno di krédito mas komo parlamentario, despues di transmishon djun presentashon asina'', asina Samsom a bisa. Fe djamars e presidente di frakshon a bisa Leerdam kiko e ta opiná di henter e asuntu. E parlamentario brongosá a ofresé su diskulpa, el a pens'é i despues e mes a disidí di laga kai, segun Samsom. "No ta dushi nunka, pa pèrdè un kolega", asina Samsom di.

Leerdam, nasé na Kòrsou na 1961, tabata temporalmente den Tweede Kamer komo suplente di Sharon Dijksma, ku a bai ku fèrlòf di embaraso. E tabata parlamentario kaba un tempu, o sea entre 2003 i 2010. Promé k'e bira miembro di parlamentu hulandes, e tabata direktor i dirigente artístiko di un grupo di teater.

Èks parlamentario Margo Kraneveldt ta e siguiente riba lista di PvdA pa drenta Tweede Kamer.