'Kuminsá mas tempran posibel ku lesa pa mucha. Nan lo balorá esaki despues.' Esaki ta konseho di eskritor i poeta Olga Orman. Su último buki yama 'Michi'. Olga Orman tabata wespet den e rúbrika Den Spòtlait di e programa 'Aki na Hulanda'.

Dia 20 di mart ta e delaster dia dje asina yamá 'Boekenweek', esta siman di buki na Hulanda. Tur aña durante e siman di buki akí ta pone atenshon na literatura i lesamentu di buki. Tema dje aña akí ta dirihí riba 'ten bo tabata hóben'. Muchanan ku ta lanta ku literatura.

Importansha
Olga Orman a nase na Aruba i a traha basta aña komo maestro di skol. E ta eskritor di diferente buki, istoria i poesia. Su último buki yama: 'Michi'. Olga Orman ta mashá konosí, tantu na Hulanda komo na Antia i Aruba, speshalmente riba tereno literario. E ta haña ku ta di gran importansha pa muchanan lanta ku literatura. Ku e buki Michi e ta aportá ku esei, segun Orman. "Rònt mundu ora muchanan pasa 15 aña nan tin ménos atenshon pa lesa, dor ku nan mester lesa sierto bukinan pa skol. Ora nan bira grandi nan ta bolbe apresiá lesamentu. Tambe ora nan mes tin yu i lo lesa pa nan yunan." Orman a splika ku despues di 25 aña e interes pa lesa ta oumentá atrobe.

Michi
'Michi' a sali na luna di òktober aña pasá riba merkado. 'Michi' ta skibí na Papiamento, Papiamentu, Ingles i Hulandes. E buki ta konta i mustra desaroyo di un mucha ku ta kresiendo. Orman: "E ta un buki pa mama, tata, ruman òf wela lesa e buki pa muchanan. Michi ta deskubrí su mundu i ta deskubrí tambe ku no ta tur kos ku hende bis'é hasi, e kier hasi. Tin biaha mayornan ta skual mucha, pero ta un desaroyo normal ku e mucha ta pasa aden."

Ilustrashon
Wendela de Vries a pinta e ilustrashonnan den 'Michi'. Ilustrashonnan ku koló suave, pintá riba papel di palelá muraya. Segun Orman a paga mashá atenshon na e ilustrashonnan ku ta duna e buki un dimenshon èkstra. "Ta importante pa no ripití tur loke bo ta skibi den ilustrashonnan. Den 'Michi' tin hopi kos skondi den e plachinan. E muchanan ta deskubrí kiko mas tin riba e plachi ku no ta pará den e teksto. Esei ta enrikesé e buki."

La Kock Publishing di Alida Kock ta e kas editorial ku a publiká e buki. E aña akí mes Olga Orman ke publiká un buki di prenchi nobo i e tin otro publikashonnan mas den tapara.