Kon e moda di biba ta di nos hende grandinan na Hulanda? Kon nan lifestyle o sea estilo di bida ta kompará ku esun na e islanan karibense? Nos di Aworaki a bishitá e bolsa pa hende mayor di 50 aña konosí komo '50Plus Beurs', ku a tuma lugá te ku ayera na Jaarbeurs Utrecht. Na e bolsa por a bishitá stènt ku produkto spesial pa grandinan, kuminda alternativo, moda i artefakto adaptá pa simplifiká bida na kas. Aya nos a topa ku dos tipo di grandi bibá na Hulanda: esnan ku ta gusta biba na tera friu i esnan ku bon mirá ta preferá bai bèk nan isla natal.

Edith Straus-Marsera a bishitá e bolsa na Utrecht. Antes e tabata move hopi den polítika na Boneiru. E tabata minister, parlamentario i miembro di Konseho Insular di Boneiru. Despues el a hasi hopi trabou boluntario tambe. Tres aña pasá el a bandoná tur kos na Boneiru pa bin Hulanda, pero 'awor ku friu drenta sí kabes ta den solo atrobe', segun señora Straus-Marsera, pues ta un pasá te Boneiru pa 'hui pa friu'. Straus-Marsera ta splika ku e relashon ku bisiña na Boneiru ta otro ku na Hulanda. Na Boneiru e kontakto ta mas habrí, mas di konfiansa, 'Rincon ta un famia grandi', na Hulanda tur hende ta mas riba nan mes.

Transporte públiko barata
Señora Wini Booi di 71 aña ta bibando pa di dos biaha na Hulanda. Kompará ku Kòrsou, e ta haña Hulanda '40 porshentu mas adelantá', ku esei e ta referí mas bien na transporte públiko barata i moveshon liber ku Hulanda ta ofresé pa hende di edat, pa esei so kaba e ta preferá biba na tera friu.

Mildred Mook tabata pará na un stènt ku ta ofresé tarheta tridimenshonal i kos pa dòrna kas. Edith Essed, un amiga di dje tin 40 aña ta bibá na Hulanda, el a traha hopi aña i despues el a baha ku penshun, ainda e ta bibando na tera friu. Nan a diskutí amenamente ku otro, komparando bida na Hulanda ku esun na Kòrsou. Dimes nan ta interesá den biahe barata pa Antia.

Aktitut positivo
Dorothea Wernet-Baars i Janchi Baars ta ruman di otro i a bishitá e bolsa djis pa sali, pasa bon. Bida ta bayendo trankil, Wernet-Baarse ta rekomendá pa kome i biba bon i pasa kontentu, biba e bida mané e bin. Frankamente e no ta asosiá su mes ku e término 'hende grandi'. Janchi Baars no ta kere ku tin muchu diferensha entre Hulanda i Antia, na tur dos sitio e ta gosa un mundu di naturalesa.

Camille Paz Rivero di ofisina di Turismo di Kòrsou establesé na Hulanda ta kontentu ku e interes ku tantu Antianonan bibá na Hulanda komo esnan di Karibe ta mustra pa nan isla natal. "Tin hende ta bin, pasa kue foyeto, saka potrèt i konfirmá, bisa ku nan ta yu'i Kòrsou i ku ke 'bai kas', maske ta pa un ratu...