Cynthia Ortega-Martijn, miembro di parlamento hulandes pa e partido Christen Unie, ta di opinion ku no ta prudente pa reakshoná riba kontenido di e karta ku bestürskolezje di Boneiru a manda pa sekretario di estado pa asuntunan di reino, Ank Bijleveld.

Skibí pa Johan Oldenboom

Den e karta akí bestürskolezje di Boneiru ta bisa ku Bijleveld ta mete di forma direkto ku polítika lokal i ta trata di influenshá resultado di e referèndem ku ta na kaminda.

Un reakshon riba kontenido di e karta lo krea mas konfushon, segun Ortega-Martijn. E parlamentario ta sigui bisa ku no mester mete na momentu ku ta trata di un referèndem. Esaki pa no influenshá e pueblo ku tin ku bai vota. 'Laga e pueblo skohe lokual e tin ku skohe. Nos tin ku respetá esei, anto despues nos ta bai wak atrobe kiko tin ku bai pasa', segun e parlamentario.

Pa loke ta trata e fecha di 10 di òktober 2010, Ortega-Martijn no ke bisa nada ainda. Na momentu ku pueblo di Boneiru disidí ta bai wak kon ta sigui ku e proseso pa jega 10 10 10. Parlamento hulandes mester sigui ku tratamentu di leinan na luna di yanüari. Segun Ortega, por saka nòmber di Boneiru fasilmente for di e leinan - si esei ta nesesario - ku un 'nota van wijziging'. Saba i Sint Eustatius si ke sigui mas pronto ku ta posibel, ku e trajekto pa bira munisipio èkstra ordinario di Hulanda.