Kuskus afrikano kombiná ku mòksi meti sürnam. Esaki por den The Colour Kitchen. E 'rèstorant mundial' akí a gana premio Hanneke Douw komo ku e ta ofresé oportunidat di trabou na hóbennan marginá. E kòkinan i esnan ku ta sirbi kuminda tambe ta bin di tur skina di mundu.

Ta rùn e rèstorant komosifuera ta un ekipo di futbòl e ta mas o ménos, asina gerente i fundadó Loek Beeren ta konta. "Ora trabou kuminsá nos ta duna otro man anto ora di bai kas nos ta bolbe duna man." Tin anochi ku e ambiente por ta poko tenso sí, pero despues di 'wega' a bolbe logra algo. "Esei ta fomentá solidaridat."

Kultura
Sürnam i Antiano tambe ta traha na e rèstorant. Huntu ku Dominikano, Brazilero i vários otro nashonalidat nan ta prepará plato pa e klientela. "Nos ta purba trese diferente kultura huntu i duna nan formashon. E diferente hende i platonan ta prueba di tur e kolónan akí. Djei e nòmber 'The Colour Kitchen.'

Beeren sa tuma riesgo sí debésenkuando, manera ku Etienne di Sürnam por ehèmpel. Beeren tabata duda di su kapasidatnan, pero e kòki yòng a ofresé di traha dos luna p'e sin pago. Den e periodo ei el a mustra kiko e por. "Mi ta haña leuk pa sera konosí ku otro kultura", asina el a bisa.

Hopi biá e hóbennan tin difikultat pa haña trabou òf nan ta keda sin kaba nan formashon. The Colour Kitchen ta ofresé nan e oportunidat pa traha riba nan futuro tòg. Beeren ta menshoná e ehèmpel di bistimentu di lensu di kabes, ku no ta pèrmití den hopi rèstorant na Hulanda. Serka dje sí. "Nos ta habrí pa tur sorto di kultura, pasobra nan ta enrikesé esun di nos."

Stazje
Angeline ta sirbi kliente den e rèstorant pa e kaba su kurso di anfitriona (hostess). E damita ta yu di Kòrsou i e ta kore stazje na The Colour Kitchen, despues ku a rechas'é vários otro kaminda. "Mi no tabata sa dikon. Nan tabata bisa ku mi no ta fet den e empresa." E no ke usa e palabra diskriminashon, pasobra dimes ta difísil pa haña un lugá pa kore stazje. "Kisas ta mi mes por ke." E gusta mashá na The Colour Kitchen. "Ta bayendo mas i mas mió."

E proyekto di Beeren ta un éksito. Ya tin plan pa amplia e kantidat di establesimentu. Awor tin intenshon di kuminsá na Breda i Utrecht tambe i a manda un petishon di franchise pa start ku e fórmula akí na Kolombia.