Mas grandi problemanan sikiátriko i síkiko ta serka hóbennan antiano, mas grave e delitunan ku nan ta kometé. Esaki ta ún dje konklushonnan for di un investigashon bou di hóbennan antiano na Rotterdam.
 
E grupo di sinkuenta hóben ta bou di tratamentu di RIAGG na Rotterdam. Insiador dje investigashon ta e sikiater hubenil i di mucha Glenn Helberg. E investigashon a proba tambe ku e asina yamá diferenshanan kultural apénas tin influensha riba e komportashon kriminal dje hóbennan.  
 
Nunka promé no a analisá asina eksakto e problemátika síkiko, segun profesor Chijs Nieuwenhuizen. Otro investigadónnan a studiá partikularmente desendensia i faktornan di riesgo. For dje investigashon akí a sali na kla ku pa loke ta trata komportashon delinkuente tin diferensha entre e grupo ku problema i e grupo sin problema sikiátriko.
 
Grupo vulnerabel
Segun e investigadó ta trata di hóbennan vulnerabel ku ya ta haña guia di RIAGG. "Denter dje grupo akí tin un grupo ku ta bai malu kuné. E hóbennan akí tin problemanan emoshonal i di komportashon. Un otro grupo di hóben ku tambe ta  haña guia di RIAGG tin apresio propio i ménos keho síkiko. E kos akí ta remarkabel pasobra e dos gruponan no ta diferenshá den e grado di integrashon, kuantu tempu nan ta na Hulanda i pasado eskolar". E promé grupo a kometé muchu mas delitu serio.
 
Un dje konklushonnan di Van Nieuwenhuizen ta ku pasado kultural no ta kousa di e komportashon delinkuente. E situashon sikososial ta mustra mas importante. Segun Van Nieuwenhuizen e resultado akí ta pa gran parti komparabel ku hóbennan hulandes. Hóbennan antiano tin si mas biá ADHD i miedu i tambe ta mustra mas biá komportashon ku ta desviá di norma.
 
Kriminal chikí
E investigadó tin gana sigui un grupo di hóben na Kòrsou pa por bisa mas dje kousanan di komportashon kriminal. A base dje investigashon e por bisa sí ku no por generalisá inhustamente tur hóben antiano: "Ku nan ta puramente kriminalnan chikí, no ta klòp." E imáhen general negativo di hóbennan antiano ta pa e motibu ei inhustu, segun Van Nieuwenhuizen.
 
Skucha profesor Chijs van Nieuwenhuizen den kombersashon ku Désirée Martis.