No ta falta mashá pa Antia hulandes pasa pa buki di istoria. Entrante 10-10-10 Kòrsou i Sint-Maarten ta bira pais outónomo den Reino, mientras ku Boneiru, Sint-Eustatius i Saba ta bira munisipio spesial di Hulanda. Aruba a haña su státùs aparte for di 1986. Den e serie 'Ku bista riba futuro', antianonan bibá na Hulanda ta konta kon nan ta wak futuro di nan isla stimá. Den e entrega di awe: Diana Doorstam

Pa Diana Doorstam, 49 aña, nasé na Kòrsou, dosente di ekonomia na un skol sekundario pa enseñansa di fishi, no ta asina ku Antia ta stòp di eksisti. E ta mira e kambionan estatal mas bien komo un reto pa e islanan bai traha ku otro na un manera distinto.

No ta duel Doorstam ku Antia ta stòp di eksistí, pasó p'e simplemente Antia tei pa keda, úniko kos ku nan lo sigui traha huntu sí ounke ménos ku antes i separá den Reino ulandes.
"Ta bon pa Kòrsou para riba su mes pia", segun Doorstam, ya ku na su pareser esei tabata deseo di e isla basta tempu kaba. Fuera djesei Kòrsou tin sufisiente potensial riba tereno ekonómiko pa para riba su mes pia.

Diana Doorstam ta rekonosé ku un peso di responsabilidat a kai for di Kòrsou, pero tambe pa e islanan chikí un peso a kai, e alivio ku nan mester ta sinti despues di años di mando for di Willemstad. "Pa ambos partido ta bon pa nan haña un chèns di lòs for di otro i disidí riba nan mes."

 

Yudansa di Hulanda
Doorstam ta di akuerdo ku un tiki metementu di Hulanda, ku defensa i asuntunan di ekstranheria, i tambe mirando e manera kon a manehá e parti finansiero den e último 20 a 30 aña. "Nos por usa yudansa di Hulanda masha bon mes n'e momentunan aki, ta pa un ratu, pa yuda nos sali for di e situashon un tiki prekario finansieramente, pa despues nos mes bai regla nos mes asuntunan."

"Mi a traha un plan di sinku aña pa mi regla pa mi por bai bèk: mi mester desmantelá algun kos despues di hopi aña na Hulanda pa mi por bai Kòrsou bèk."