No ta falta mashá pa Antia hulandes pasa pa buki di istoria. Entrante 10-10-10 Kòrsou i Sint-Maarten ta bira pais outónomo den Reino, mientras ku Boneiru, Sint-Eustatius i Saba ta bira munisipio spesial di Hulanda. Aruba a haña su státùs aparte for di 1986. Den e serie 'Ku bista riba futuro', antiano bibá na Hulanda ta konta kon nan ta wak futuro di nan isla stimá. Den e entrega di awe: Carlina Martinez (82 aña)

Carlina Martinez (82 aña) a nase na Venesuela i el a lanta na Kòrsou. E tin 24 aña bibá na Hulanda. Futuro di Kòrsou tin e prekupá. Si ta p'e Antia lo a keda eksisití. Martinez ta resa pidi Dios pa bendishoná gobernantenan di e islanan, pa nan hasi loke nan a primintí pueblo.

Desaroyonan dudoso
Status aparte di Aruba i awor di Kòrsou tambe, pa Carlina Martinez ta un desaroyo poko dudoso pasó 'kiko ke hasi, nan a aseptéle... pero mi ta spera ku nan ta traha bon.

Otro fenómeno ku Martinez no ta mashá kontentu kune ta ku vários kompania na e islanan a hisa bela bai. E dama di edat avansá ke sa kon ta bai hasi ku Kòrsou riba su mes? "Grandinan a hasi tur kos bon pa hubentut awèl hubentut lo por weta un bon solushon."

Bai Kòrsou, pero no pa keda
Señora Martinez no tin intenshon di sali for di Hulanda bai biba Kòrsou, 'tur nos muchanan ta na Hulanda, Aruba i Santo Domingo.' E no ke bai biba Kòrsou bèk pa motibu di su edat, 'kiko mi ta bai hasi Kòrsou, mester buska kas dinobo, adaptá na e sistema'.
Ademas, kasi tur su amistatnan a bai sosegá. E tin famia sí, subrinunan k 'eseinan, pero despues di a biba 24 aña su so, e no ke dependé di ningun hende. E ke keda bai Kòrsou sí tur aña, manera ta su kustumber.