Delegashon di Kòrsou ta satisfecho ku palabrashonnan hasí durante reunion maratóniko di Grupo Piloto polítiko na Den Haag. Kòrsou a logra kumpli ku enkargo di pueblo pa laga inkorporá e klóusula di terminashon por eskrito, pa posibilitá opshon di un statùs diferente den futuro. Esaki por sosodé durante un asina yamá Konferensha di Reino, ku lo tuma lugá por lo ménos un be pa aña.

E palabrashonnan di prosedura ta pará riba number 52, 53 i 54 di lista di desishon di Grupo Piloto. Den e deklarashon final di e último Konferensha di Mesa Rondó di mañan djaweps 9 di sèptèmber lo referí na e puntonan aki.

Mandato
E mandato ku Kolegio Ehekutivo nobo di Kòrsou a bin kune pa trata den e deliberashonnan na Hulanda a lant'un diskushon formal den e reunion di Grupo Piloto di ayera, djamars 7 di sèptèmber. Sheldry Osepa (MFK), diputado nobo di Asuntunan Konstitushonal di Kòrsou, a bin Hulanda ku e enkargo pa laga fiha pretu riba blanku ku semper bai Kòrsou por hasi uso di e derechi di outodeterminashon pa opta eventualmente pa independensha. Finalmente a logra esaki, pero gobièrnu di Antia e difikultá e asuntu.

Grupo Piloto
E reunion di Grupo Piloto a dura te den oranan di mardugá komo ku delegado di gobièrnu antiano, èks promé minister Etienne Ys a oponé e proposishonnan di Kòrsou fuertemente. "Pais Antia ulandes no kier a koperá ku e desishon ku Konseho Insular a tuma", segun Osepa. "A kosta bast'un pidi esfuerso pa konvensé spesífikamente èks promé minister Etiënne Ys (PAR) pa bai di akuerdo tòg ku e proposishon." Osepa ta orguyoso ku a logra, apesar dje retraso. 'Nos a logra esaki den kuater dia, loke gobièrnu antiano enkabesá pa PAR no a logra den kuater aña', asina Sheldry Osepa a deklará.

Outodeterminashon
Kòrsou a laga kodifiká ku proseduralmente por opta algun dia pa un statùs diferente. E pais ke ta den e posibilidat pa hasi uso 'anytime' di e derechi di outodeterminashon. "Pero, asina Osepa ta bisa, awóraki no tin kuestion di esaki: "Tin hende ta bisa ku nos a bin Hulanda pa bira independiente, pero esei no ta bèrdat."

Osepa a ripará ku señalnan inkorekto tabata kore den media i den komunidat. E ta enfatisá ku e delegashon di Kòrsou 'a bin buska prosedura pa sali for di e leinan di konsenso, pa garantisá pueblo di tur su derechonan, pa e tuma su desishonnan ora e ta kla p'e. No a bin pa buska independensha!'

Konferensha di Reino
Diputado Sheldry Osepa a bisa finalmente ku en todo kaso e delegashon ke pa inkorporá un provishon pa ora tin mester di dje. "Kòrsou por ta satisfecho di loke nos a hasi."

Na final di kuenta a palabrá ku eventualmente Kòrsou por trese deseonan nobo dilanti riba tereno estatal durante un Konferensha di Reino, ku lo mester tuma lugá por lo ménos un biá pa aña, loke tabata punto 7 riba agènda.

Aruba
Pa promé minister Mike Eman di Aruba ta mas ku klaro ku e islanan por disponé i hasi uso di nan derechi di outodeterminashon: "Ta algu ku tin un base sosial amplio." E ta trese dilanti ku semper mester skucha ideanan nobo.

 

Eman porsierto no tin e impreshon ku pueblo di Kòrsou ke bira kompletamente independiente. "Si e kabesantenan polítiko ke algo diferente e ora ei pueblo mester duna su opinion al respekto den un referèndem." E ta kere ku Kòrsou, meskos ku Aruba por lo pronto lo skohe pa un bon relashon ku Hulanda i Oropa.