Na Kòrsou a logra un akuerdo pa formashon di un Bestürskòlezje, o sea un Kolegio Ehekutivo nobo.  Despues djun dia largu di rumor i negosiashon e partidonan Movementu Futuro Korsou (MFK), Pueblo Soberano (PS) i MAN a yega n'un repartishon di tarea, mainta tempran di djasabra, 4 di sèptèmber. E siman akí mes e tres partidonan di oposishon a firma un deklarashon di intenshon.

Firmamentu dje akuerdo di gobernashon kon ku bai bin tabata inesperá. Helmin Wiels, dirigente di Pueblo Soberano a manda un karta fechá 2 di sèptèmber pa e eventual partnernan di koalishon den kua el a pone soberania i derechi di kanselashon komo asuntunan sentral pa pais nobo Kòrsou. Pa Wiels ta fundamental ku no Hulanda so sino Kòrsou tambe - komo estado soberano - por disidí riba leinan di reino enkuanto polis i institutonan penitensiario.

Kartera
Despues ku MFK i PAR lo a negoshá ku otro i kue un rumbo diferente pa yega na formashon djun gobièrnu, mester a pidi èks promé minister Don Martina (MAN) pa yuda trese e tres partidonan di oposishon huntu atrobe, hasiendo uso di su eksperiensha komo estadista. Esei a logra. Kon a elaborá riba e diferente puntonan di bista ta kos ku lo tin di warda mira; echo ta ku distribushon dje karteranan ta parse di lo resultá den Turismo i Ekonomia, i tambe Kultura, Enseñansa i Deporte pa Pueblo Soberano, Infrastruktura pa MAN antó pa MFK: Salubridat públiko i Asuntunan General, al igual ku Finansa i e kartera di Asuntunan Konstitushonal.

E Konseho Insular i e Kolegio Ehekutivo nobo lo huramentá djasabra, 4 di sèptèmber. Mésora despues lo trata Areglo di Estado di nobo pa futuro pais Kòrsou. Na yüni último e konstitushon nobo akí no a logra alkansá e mayoria di dostersera parti rekerí den Konseho Insular, asina ta ku mester a tene elekshon. Dia 27 di ougùstùs MFK a risibí 5 di e 21 asientonan, PS 4, MAN 2, PAR 8, PNP 1 i FOL tambe 1.

Delegashonnan
Si awe djasabra un mayoria komun aprobá e Areglo Estatal, e or'ei kaminda ta habrí pa e delegashonnan biaha pa Hulanda mañan djadumingu, 5 di sèptèmber pa klousura di Konferensha di Mesa Rondó (RTC) di 9 di sèptèmber próksimo. Na e okashon ei lo evaluá tur kos ku a palabrá den marko di e kambionan estatal. Na Kòrsou un delegashon basta formal lo ta kla ku maleta ku tur pa tumba den direkshon di Den Haag.