Un grupo di hende di edat prosedente di e islanan di Karibe Hulandes ta reuní algun bes pa siman na pasadia Korona di Sabiduria na Rotterdam. Ei nan ta rekreá nan mes, hasi algu di obra di man, gosa di muzik i kome kuminda krioyo. Yambo ku funchi por ehèmpel no sa hasi falta na Korona di Sabiduria, ku ta okupá un sala den un instituto pa kuido di ansiano.

Ruthmila Cicilia di Kòrsou ta motor tras di e proyekto aki. E ta miembro di direktiva di Stichting Zorgcocon Kuido pa Ansiano ku ta manehá e pasadia. Resientemente e tim ku ta produsí ‘Herensia’ a bishitá Pasadia Korona di Sabiduria pa kombersá ku algun di su bishitantennan. A papia ku hendenan
prosedente di Kòrsou, St. Eustatius, Boneiru i tambe un señora di Dominica, ku a yega di traha ántes na Kòrsou.

Kultura
Hustamente na momentu ku hendenan ta birando mas bieu, nan propio kultura i kustumbernan ta sumamente importante. Hopi hende di edat ku un orígen afro-karibense tin nesesidat di un propio lugá na unda nan por topa ku otro pa kombersá. P’esei a krea e pasadia ‘Korona di Sabiduria’ den e kas di kuido pa ansiano ‘Simeon & Anna’. Ta trata di un sala agradabel na unda ta organisá tur sorto di kos. Tur aktividat ta bou di guia tambe di hendenan di propio kultura.

“Huntu ku e bishitantenan nos ta wak kiko ta bai hasi e dia ei. Tur kos ta posibel. For di kushinamentu di kuminda krioyo te kantamentu di kantika di e islanan. Tin bes ta hasi gemnastik, otro bes ta sali pa hasi ekskurshon. Tambe nos ta dediká atenshon na tópikonan importante den e bida di hende grandinan. Asina tin informashon por ehèmpel tokante biramentu bieu salú I tambe tur sorto di provishon ku tin. Tambe nos ta para ketu na temanan ku e bishitantenan mes ta bini kuné”, segun Ruthmila Cicilia, kende ta konta ku sosten di un tim di boluntario ku ta traha na Korona di Sabiduria.

Solitario
Pasadia Korona di Sabiduria ta destiná pa grandinan di orígen afro-karibense ku por ehèmpel tin difikultat pa strukturá nan dia i pa personanan ku a kuminsá pèrdè nan memoria. Tambe e pasadia aki t’ei pa e personanan ku ta sinti nan mes solitario òf ta un tiki tristu i ku tin difikultat pa establesé kontaktonan nobo. Ademas e ta aliviá famianan di e kuido ku nan ta duna nan grandinan.

Korona di Sabiduria ta habrí dos bes pa siman, esta djamars i djaweps di 10’or di mainta pa 3’or di atardi na e kas di kuido ‘Simeon & Anna’ den Rotterdam. Hendenan ku tin un indikashon médiko no mester paga pa bishitá pasadia Korona di Sabiduria. E otro bishitantenan ta paga un kontribushon chikitu.
Asta ta eksistí e posibilidat pa buska e personanan ku tin problema pa kana na nan kas trese na e pasadia.