Famia, amigu i konosí djamars anochi a konmemorá Ramsis Kwidama na Rotterdam. E ta e hòmber ku siman pasá a hoga ora ku el a trata di salba un mucha for di den e awa di Nieuwe Maas. Na e enkuentro na Schiehoofd tabatin mas o menos 250 hende presente.

Siman pasá Ramsis Kwidama a bula den awa di Nieuwe Maas pa yuda un mucha hòmber ku tabata na peliger. Djaluna a haña Kwidama su kurpa sin bida den IJselhaven. Lo dera e salbadó na Kòrsou. Esaki ta motibu di e konmemorashon na Rotterdam. Djamars anochi famia i amigu na Hulanda a haña oportunidat pa tuma despedida. Presidente di deelraad durante e enkuentro a laga sa ku ta bai wak si e víktima ta bini na remarke pa un kondekorashon di heroe.

‘Mester duna famia kompensashon’
Leefbaar Rotterdam djamars a sugerí pa duna e famianan un kompensashon finansiero pa e entiero. “Aktualmente e famianan ta prinsipalmente okupá ku aseptashon di e drama, pero riba término korto probablemente nan lo haña nan konfrontá ku e gastunan”, Robert Simons ta skibi gobièrnu di e siudat. “Leefbaar Rotterdam ta di opinion ku den e kaso aki munisipio mester yuda.”

Reportahe: RTV Rijnmond