No na Estados Unídos so, aki na Hulanda tambe ta evaluá resultadonan ku gobernashon di Obama tabatin te awor. Kiko Barack Obama a logra den su promé aña komo presidente?

Umbes despues di su elekshon komo e di 44 presidente di Estados Unídos, henter e nashon merikanu a pone fe den dje. Barack Obama, yòn i prometedor tabata personifikashon di e kambio ku Merka tabata anhelá asina tantu. Na Hulanda tambe e fanátikonan antiano tabata entusiasmá ku su presidensia. Algun di nan asta a biaha bai Washington pa mira su inougurashon komo e di 44 presidente di Merka ku nan mes wowo. Un aña a pasa. Un aña e ta desempeñando funshon di presidensia di Estados Unídos. E pregunta ta si ainda nan ta gab'é asina tantu, si ainda e ta nan ídolo awor ku e ta na mando?

Mester dun'é un chèns
Laurindo Andrea, diseñadó antiano di moda tambe ta un atmiradó di Obama. Pero loke ta molostié ta ku hende tin e tendensha di kritiká e presidente sin miserikordia. Andrea: "E ta traha kétubai riba su promesanan k'el a hasi. Mester laga Obama na pas. Nos tin ku stòp di keda kritiká, kaminda ku nos niun tin su sapatu bistí, ni nos no ta sintá riba su stul. Dunele su kuater aña di término ku e meresé." Laurindo Andrea ta spera di kurason ku Obama lo sigui ku e mes forsa i energia positivo ku el a kuminsá kune i ku lo e mantené e forsa ei pa e tres añanan benidero.

Sistema bankero a skapa
Bankero Cadula Jones ta satisfecho ku su presidensia. E ta haña ku Obama ta funshonando mashá bon mes, aún mas mirando e sirkunstanshanan den kuá e tin ku traha i e krísis ekonómiko mundial. "El a sòru pa e sistema bankero na Merka no kai den otro kompletamente, el a sòru pa introdusí e seguro médiko, pa tur hende na Merka por ta sigurá." Apesar di oposishon fuerte di e Republikanonan, el a logra hasi hopi kos. Jones ta apresiá e propósito di Obama pa sera Guantánamo Bay, esei siendo ku semper Merka a hasi manera ta nán ta manda, manera ta polis di mundu nan ta, sin tene masha kuenta ku derechi di pueblo. Ta di atmirá ku Obama a atmití ku Merka a hasi malu, segun Jones.

Krítika ta di komprondé
Refiriendo na e avalancha di krítika ku Obama a risibí último tempu, Jones ta remarká: “Mi ta haña ku hende tin rason. Ora k'e haña krítika e no ta kontestá direktamente i duna bon splikashon kon e ta bai regla sierto kos, pero e ta keda duna spich. Anto hendenan a kuminsá fada di spich. Esei ta bon ora kore kampaña, pero awor ku e ta na mando e mester splika mas konkretamente kiko e ta bai hasi i ki ora antó ora nan kritik'é e mester bisa dikon e no ta ens ku hende."

Mensahe di Cadula Jones pa Barack Obama ta pa e 'pensa tres kos konkreto ku e ke realisá awóraki, i pa e fokes riba e tres kosnan ei, pa asina e hendenan di Merka por sinti ku el a hasi algu pa nan, pa asina e por gana e próksimo elekshonnan i sigui drecha Merka.'

Bernard Hammelburg, komentarista pa Wereldomroep di asuntunan di eksterior, ta splika dikon (na su pareser) popularidat di Obama ta bahando na Merka, i kon bin un presidente, ku semper a ekslamá ku tantu brío 'Yes, we can' ta menasá di para bira e estadista merikanu ku no por hasi masha kos.

(e vidio ta na ingles)