Komunidat antiano na Hulanda ta hambrá pa informashon tokante reino nobo. Pesei mes reim 100 antiano a bishitá un enkuentro tokante konsekuensia di relashonnan estatal nobo den reino.

Durante un debate na Bijlmerparktheater na Amsterdam Zuidoost tabata bisto ku mayoria di hende ta interesá pa emigrá bai e islanan. Segun Maudi Bernadina, presidente di Sabana, órgano di konsulta pa hulandes karibense na Amsterdam, e grupo ei tin masha interes pa e e tipo di aktividat akí. "Aña pasá tambe nos a dediká atenshon na e kos akí, pero sierto informashon no tabata konosí. Ta pesei nos a bolbe organisá un atardi di informashon."

Kon sierto proseso a kana? Bernadina ta kere ku esnan presente tabata masha kurioso pa sa esei. "Den kòmbersashon bo ta tende hopi biaha ku Hulanda a disidí pero e aklarashon ta mustra ku ta konhuntamente a disidí." Antiano ta kurioso pa sa kiko e reglanan nobo ta nifiká pa nan. "Mi por bai bèk mas fásil awor?", ta un pregunta ku a hasi bários biaha. "Esei ta dependé di kada persona, ke men no por a kontestá e pregunta ei bon", asina Bernadina ta bisa. Segun e promé ku renobashon estatal ya kaba tabatin interes pa emigrá bai e islanan.

Falta di informashon
Vise presidente Yazir Francisca di Sabana a ripará durante e debate 'ku no tin ruta kompletamente kla' ni 'instansha pa informá' esnan ku ke remigrá. Francisca a bisa ku pa awor hende ku ke remigrá por akudí tur djabièrnè na Kas di Kòrsou. Ei ta tene un 'Ban Topa' pa duna informashon. El a ripará tambe ku Aruba ku tin su státus aparte pa 25 aña kaba, tampoko no tin tur infromashon bon organisá i strukturá pa esnan ku ke bai nan isla bèk.

Fasilidat
E kantidat di hende ku ta bini Hulanda ta konsiderablemente ménos ku e kantidat di hende ku ta bai e islanan bèk, asina Bernadina ta opiná. Habitantenan for di di islanan BES, ku awor ta munisipio spesial di Hulanda no mester kere ku awor e fasilidatnan na e islanan ta meskos ku na Hulanda. Bernadina: "E leinan sosial ku nos konosé aki, no ta konta aya. Ei nan tin otro regla, relashoná ku e nivel di bida i loke ta sosodé ei. E ùitkeren ku bo ta haña na Hulanda, bo no ta haña outomátikamente na Boneiru, Sint-Eustatius i Saba."

Durante e atardi di informashon a splika esnan interesá ku e islanan no ta kla ainda pa un ola di emgrashon. "Awor nan ta drechando infrastruktura. Esei no ta keda kla di awe pa mayan. Si hende ta mira posibilidat, nan mester bai bèk sigur, pero bon prepará sí. Un tiki un tiki, no por risibí miles di hende den un periodo kòrtiku."