Djaluna Kolegio Ehekutivo di Boneiru a kai. Rafael Santana, miembro di Konseho  Insular pa Partido Pro Union i Hustisia (PHU) a retirá su konfiansa den e koalishon.

E kiebro akí no a sosodé inesperá. For di e elekshonnan di 2 di mart último, PHU ta den koalishon huntu ku Movementu Boneiru Liber (MBL) di Benito Dirksz i Partido Demokrátiko Boneriano (PDB) di Robby Beukenboom.

Siman pasá, Benito Dirksz a kanselá e protokòl di kooperashon entre e partidonan di koalishon kaba, despues ku a sali na kla ku PHU tabata den deliberashon ku UPB, un partido di oposishon, i no tabata kumpli ku loke a palabrá den e protokòl.

Na e momento ei, lider di partido PHU i diputado Michiel Bijkerk a bisa ku su partido no tabatin intenshon di tumba koalishon: "Nos lo no tumba un koalishon despues di apénas sinku luna. Nos a bini pa goberná". Djamars mèrdia, Bijkerk no tabata disponibel pa komentá.