Den un karta habrí eks-polítiko Jopie Abraham ta atvertí minister Piet Hein Donner di Relashonnan den Reino pa ‘sintimentunan latente di “odio kontra makamba ku ta stroba e manera di konvivensia harmonioso tradishonal di Boneiru.”

E eks-polítiko di PDB ta reakshoná ku e ponensia akí riba e promé reportahe di Primavera di representante di Reino Wilbert Stolte enkuanto estado di situashon na Boneiru, Sint Eustatius i Saba.

Segun Abraham ‘aneksashon’ di Boneiru tin su konsekuensianan i ta tuma e Hulandesnan presente riba e isla un k’e otro seriamente na malu. “Adaptashonnan kosmétiko di e proseso estatal ni di kontenido lo no para esaki”, segun Abraham.

Hulandisashon
Abraham ta di opinion ku restorashon di e konfiansa entre siudadano i gobernashon, na kua Stolte ta referí den su reportahe, lo no ta un asuntu simpel.

“Mas ainda pasobra e sintimentu profundo di insatisfakshon ante ‘hulandisashon’ di e komunidat Boneriano ta oumentá dia pa dia”, segun Abraham.

Reflekshoná di nobo
“Ehekushon di aktividatnan ku no direktamente ta kontribuí na mehorashon di sirkunstansianan di bida, bibamentu i di trabou òf imponé regla i lei di un banda so, basá riba e manera limitá di Hulandesnan di mira komunidat, segun Abraham ta traha kontraproduktivo.

“Un ehèmpel di kontraproduktividat ta ku ta imponé matrimonio entre mesun sekso mediante amienda”
E eks-polítiko ta terminá su ‘karta habrí’ ku e yamada na ‘amice’ Donner ku ‘un reflekshon nobo fundamental riba término kòrtiku ta nesesario pa evitá pió.”

--------------------------------------------------------------------
Baha e ‘Karta habrí’ aki (57kb, pdf)