E parti di mas grandi di gruponan di karnaval ta sera tur temporada di karnaval ku debe. Asina organisadónan di e fiesta mas grandi di pueblo di Kòrsou ta bisa.

E siman aki den Bon Informá nos a papia ku Stanley Ignacio, presidente di AGKK i Manfred ‘Feko’ Gomes, presidente di asosiashon di músiko AMAK tokante preis di karnaval. Karnaval ta un fiesta di pueblo ainda òf di florin?

Kosto
Pa organisá karnaval so, segun Gomes i Ignacio ta kosta 1.2 mion florin. E ora ei nan ta papia di kosto di pèrmit. Kosto pa disfras, músiko, instrument, catering i transporte ta bini aseka ainda. E gruponan stándart tin gastu di sigur 100 mil florin.

Derecho di transmishon
Ora TeleCuraçao e aña aki a kere ku e por a gana plaka ku transmishon di karnaval, e organisashon a disidí di mete i pidi nan parti. E akuerdo pa derecho di potrèt ta riba mesa i parse e partidonan por yega na un akuerdo. Pero no ta sigur si esaki lo paga gastunan di e gruponan tambe. “No ta yuda kasi nada”, segun Gomes.

Solushon
Redukshon di belasting pa sponser di karnaval, mas envolvimentu di sektor turístiko i supsidio di gobièrnu segun Ignacio i Gomes ta é fórmulanan pa tene karnaval na bida na Kòrsou.

Promesa di minister di Finansa Jamaloodin pa duna redukshon di belasting riba sponsermentu di karnaval nan a haña kaba. Kiko mas nan ta deseá, esei bo por tende den Bon Informá.