Resientemente por tende un karion sonoro den bario Brasil na Aruba.  Te ku algun luna pasá un klòk modesto tabata bati na misa di Brasil. Awor ta tur dia e habitantenan ta tende un karion ta resoná duru den bario. Ma no a agregá ni ún kampana den toren di misa. E zonido ta sali for di èmplifayer i di un kòmpiuter.

Pastor Jairo Maduro ta usa e sistema deskomunal akí pa yena su iglesia atrobe. Sinembargo, e pregunta ta si e habitantenan di su bario ta kontentu ku e kos akí, pasó e karion ta kuminsá fe seis or di mainta. .Na Brasil nan ta kontentu sí en general ku zonido di e karion. "Pa mi e ta bon. Batimentu di klòk ta lantábo for di soño i ta kòrdábo pa hasi orashon tur dia", asina un habitante ta bisa. Pero a drenta keho tambe. Por ehèmpel di hendenan ku ta traha mardugá òf ku ta di otro religion.

E kampana di Brasil ta bati tres biá pa dia: 6or di mainta, 12or di mèrdia i 6or di atardi. Or'e bati 12 or ta señal pa alumnonan di Sint Michael school kuminsá resa. Direktora Myrthe Everts ta bisa ku na prinsipio a keha basta sí di e zonido duru di e karion. "Nos ta splika e alumnonan i mayornan dikon pastor a bin riba e idea akí i ku ta un mensahe e ta."
 

Bishita di misa a oumentá
Pastor Maduro a tende e karion elektróniko pa promé biá na Benesuela. "Aya hopi iglesia ta disponé di un aparato asina. E intenshon ta pa kòrda hende pa resa tres biá pa dia i pa pensa riba Dios", asina e saserdote ta konta. E tin gana di mira mas hende bin misa." Ta dies luna so mi tin akinan i ya kaba e kantidat di baidó di misa a krese. E karion tin efekto antó", asina ta konklushon di pastor Jairo Maduro.

Skucha koresponsal Jos de Roo