Ku un vershon yen di zjeitu i bida di e piesa 'Mi ta enamorá' di Pierre Kartner, bènt di mucha muhé 'Loekz' ke sali ganá durante e tanda di klasifikashon pa Songfestival dia 7 di febrüari próksimo. Tessa Rodriguez, di orígen antiano, ta kantante i bailadó di 'Loekz'.
 
Rodriguez ta konta ku grásias na su bèkgrount, el a sa di hinka mas zjeitu den e piesa. Ora el a skucha e promé vershon di e kantante hulandes Pierre Kartner, el a duda un ratu sí. 'Na momento ku mi a skucha e piesa pa di promé biaha, mi a pensa un ratu sí ta kiko nos lo por bai hasi kuné? Pero nos a logra bini ku algu yen di bida i e ritmo ta lihé. Ami ta kontentu ku e piesa.'
 
Kantante popular Frans Bauer ta entrená e banda di mucha muhé. Rodriguez a kere ku Bauer tin un estilo masha popular, pero esei por pasa. 'Ta masha prèt pa mira ku Bauer tin un interes musikal muchu mas amplio ku e género ku e ta kanta. El a sugerí porehèmpel pa uza bits karibense den e piesa. E ta masha komplasiente i ta pensa di un forma kreativo. Nos ta siña mashá di su eksperensia.'
 
Segun Rodriguez, chèns ta grandi ku e banda di mucha muhé ta sali ganadó na e festival di kanto. E kuater otro partisipantenan ta kanta solo, nos ta un grupo inovador di seis mucha muhé yen di bida i energia. Mi ta spera ku esei ta oumentá nos chèns.'
 
Despues di e festival di kanto, e mucha muhénan ke sigui traha pa saka un sidi. 'Pero nos mester warda un ratu ainda ku esei', asina Rodrigues ta bisa.