Dia 3 di mart Hulanda ta bai urna pa elekshon di konsehonan munisipal. Tin 40 Antiano i Arubano riba lista elektoral di e diferente partidonan polítiko. Tin di nan ta partisipá pa promé be. Otro ta baké kaba den polítika lokal. Den e serie akí shete di e kandidatonan ta konta dikon nan a drenta polítika lokal di e siudat kaminda nan ta biba i kiko nan ke logra pa Antiano i Arubano.

Mayra Martis
'Mester bin un kambio', ta e promé kos ku Mayra Martis a bisa den deklarashon pa Wereldomroep. Mayra Martis ta kandidato number 11 riba lista di A-VIP, e partido ku Edwina Molina a lanta na Almere. Miembronan di e partido nobis nobis akí no ta 'ens ku loke ta pasando' aki na Hulanda.
 

Mayra Martis a nase na Kòrsou, e ta 'much'i kunuku' mané e mes ta bisa, semper el a gusta kunuku i e tin un 'boerderij' ku 200 baka.  
El a drenta polítika pasobra e stima su pueblo, e ta un hende ku gusta 'rechtvaardigheid', un trato hustu di pueblo. E ta mira e nesesidat di hende berdaderamente entusiasmá i ambisioso pa yuda Almere. E ta bisa ku porfin el a haña un partido ku ta pas kune, pa e yuda su pueblo.

E ta spera ku algun dia e por bai su pais bèk (Kòrsou) pa yud'é bai dilanti. E ta spera tambe ku pueblo lo yuda A-VIP. Sin e aporte di e Antianonan, no por drenta Konseho Munisipal. Pobresa i falta di kos di hasi pa hubentut antiano ta kosnan ku su partido ke traha riba dje.

Evelin Pierre-Dumfries
Evelin ta di densendensha multikultural, el a nase na Aruba, di un mama haitianu i tata sürnam, su bisawelo tabata merikanu...
Pierre Dumfries ta traha den sektor di kuido di salubridat. Ocho luna pasá el a drenta polítika. Direktiva di ChristenUnie a pidié pa asistí frakshon di ChristenUnie pa bini ku'n vishon nobo. E ta forma parti di un tim nobo, hóben i dinámiko den seno di partido ChristenUnie.

E problemanan na Amsterdam Zuidoost ta birando pió pa motibu dje krísis ekonómiko. Tin hopi kompania multinashonal, pero kasi niun migrante habitante di distrito Amsterdam Zuidoost kasi no ta traha pa nan, ni sikiera esnan studiá. Eveline Pierre Dumfries ta bringa pa resolvé e situashon i ke pone e asuntu akí riba agènda, pasobra e kos akí no ta salú ni responsabel pa komunidat. Kompanianan tambe tin responsabilidat i e tarea pa yuda resolvé e situashon i mehorá e koheshon sosial.

Tur e partidonan ke un kambio pa Zuidoost, asina ta ku futuro ta mustra bon ku e 'drive' djawóraki. Su konseho pa: 'Sòru pa bo tin bo diploma, pa bo dominá bo hulandes bon i pa bo desaroyá bo mes mas tantu posibel aki na Hulanda'.

Benjamin Brown
Benjamin Brown a nase na su dushi isla Kòrsou i a muda bai Hulanda na 1990, den promé instansia pa studia i despues di a kaba su formashon sosial el a bai traha riba e tereno ei i poko poko el a kue interes den polítika. Awor, despues di kasi 20 aña e ta postulando pa posishon di miembro di konseho munisipal di Apeldoorn. E ta kandidato number 5 riba lista di GroenLinks na munisipio Apeldoorn. E ta traha na un instituto di desaroyo multikultural, enkargá ku maneho, entre otro di diversidat kultural ku ta konsehá gobièrnu lokal riba tereno di entre otro 'jeugdbeleid'.

Benjamin, un nòmber ku ta nifiká 'esun mas chikí' sigur sigur no ta un nobato den polítika. Promé ku esei e tabata move den komunidat antiano. Apeldoorn tambe in un Beraad antiano, apesar dje echo ku e no ta un di e 22  'Antillianengemeenten'. Na 2006 e tabata riba puesto 14 i awor el a subi bai pa puesto 5 riba lista di su partido. El a disidí di influenshá komunidat komo polítiko, kaminda promé esei tabata sosodé mas bien den sirkuito sosial.

Ben Brown: "Nos ta kere ku lanta para, move i hasi algu pa komunidat antiano na Apeldoorn no mester sosodé solamente ora tin problema; nos ke ta visibel tambe pa polítika komo siudadano di orígen karibense."

Lionel Martijn
Lionel Martijn a nase na Kòrsou i ta kargadó di lista pa CDA na Deelgemeente (distrito) Charlois. Esaki ta un dje 11 distritonan di Rotterdam. Martijn ta partisipá pa último biaha na elekshon di konseho munisipal. Despues di 16 aña i mei den polítika, Martijn ta bai stòp. E mes tabata 16 aña komo diputado na su munisipio. Martijn ta haña ku a bira tempu pa e bai hasi algu otro.
 

Martijn no tin miedu ku votadónan lo no bai vota pa su partido, paso e ta partisipá pa último biaha komo polítiko. "E tim ku ta bai tuma ofer di mi, nan ta den bon man serka nan tambe. Mi por sigurá nan ku nan voto ta den bon man", segun un Martijn sumamente konvensí.
 

Lionel Martijn ta sigui konta ku e tin konfiansa den e tim di su partido i e bon trabounan ku nan ta ehersé. Ta p'esei e ta kargadó di lista tambe. Martijn: "ami ta e último pa tuma e hendenan ku vota riba mi hasi".

Margriet Nieuwenkamp-Leest
Margriet Nieuwenkamp-Leest ta bini di Aruba i ta biba na Hulanda for di 1983. E ta kasá i tin 3 yu. E ta traha den enseñansa komo dosente di ingles i komo dekano. For di chikí e ta interesá den polítika, su tata tambe tabata den polítika.
 

Aktualmente e ta kandidato number 8 riba lista di GroenLinks na Zwolle. Su metanan prinsipal ta: enfatisá ku hubentut mester por studia. Pa komunidat antiano i arubano en partikular su meta ta pa nan bira mas konsiente di e posibilidatnan ku tin aki na Hulanda.

Robert Janga
Robert Janga ta number 8 riba lista di ChristenUnie na Den Helder. El a nase na Kòrsou pero gran parti di su bida el a biba na Hulanda. Na Den Helder e ta miembro di Iglesia New Song.

Antiano na Den Helder, segun Janga no ta bon mirá i e ke kambia esaki. E ta haña ku iglesia so no ta logra i ta p'esei e ke logra su metanan ku sosten di polítika. “Hulandes i Antiano no ta komprondé otro", segun Janga. Ta p'esei ku sosten polítiko e ke kuminsá un plataforma kaminda e diferente gruponan por papia ku otro i asina yega mas seka di otro.

Tabata un inisiativa di ChristenUnie pa trese hende di New Song den partido na Den Helder i Janga tabata interesá. E ta sinti su mes na kas den ChristenUnie pasobra e partido ta hiba un polítika di norma i balor kristian pa alkansá nan metanan.

Merdio van Uytrecht
Merdio ‘Dio’ van Uytrecht, nasé na Kòrsou, tin kasi 40 aña bibá na Terneuzen ku su famia. Semper e tabata envolví den asuntunan antiano. E ta aktivo den SAAB (Stichting Antilliaans en Arubaans Beraad) di Terneuzen. E ta kandidato number 18 riba lista di CDA.
 

"Pa nos tin derechi di papia nos mester bai vota." Asina Van Uytrecht ta motivá su interes polítiko. Komo ku e ta envolví den komunidat antiano, riba tur tereno partido CDA a pidié pa bira miembro di partido i el a tuma den pasobra "den e partido akí nos ta haña mas oído", segun van Uytrecht. I djei a bin resultá ku CDA a pidié pa bira kandidato pa konseho munisipal. Di e manera akí van Uytrecht a kibra ku un tradishon.

Añanan largu el a vota pa PvdA. Van Uytrecht su punto di akshon, su meta prinsipal ta: Mas aseptashon pa komunidat antiano.