Munisipio di Amsterdam ta bai kuminsá ku un kampaña kontra e asina yamá 'hiv- i homohealing'. Dje manera akí lo mester atraé atenshon pa e peligernan dje 'enkuentronan di sanashon' akí. Mas aleu e kampaña mester laga iglesianan konosé e riesgonan dje enkuentronan di healing.

Esaki ta resultado dje kombersashon entre wèthouder Freek Ossel (diversidat), distrito Zuid-Oost, e organisashon ku ta sali na interes di homoseksual COC i nuebe iglesia di migrante. E asina yamá 'hiv- i homohealings' ta enkuentronan na vários iglesia di migrante den Bijlmer pa kura hende ku ta kontagiá ku viro di hiv òf kura di homoseksualidat. Hopi Surinameño i Antiano ta bishitá e iglesianan ei. Ossel ta yama e reunion ku tur e iglesianan, COC i distrito Zuid-Oost unu históriko. E no ta sigur si ta tuma lugá healing di hiv den e misanan ku a asistí na e reunion: "Tabatin misa aserka ku ta suponé esei di nan."

Ossel tin miedu ku tin hende ta keda leu for di kuido di salubridat regular. E ke instigá lidernan religioso pa stòp ku e enkuentronan. Nan mester manda pashèntnan dòkter di kas, segun e wèthouder. E ke yega na palabrashonnan práktiko.

Diskushon animá
E misanan i COC mester a kustumbrá ku otro, pero despues a sigui un diskushon animá, segun Ossel. Kasi tur misa a duna di konosé durante e kombersashon ku ta bèrdat nan ta buska refugio den nan kerensia i nan ta kere den milager, pero ku nan no ta mira nan mes komo dòkter. Yen idea ku a subi mesa lo mester trata mas despues.

Si ta na Ossel lo bin un kampaña konhunto pa mustra hende riba prevenshon kontra hiv i ku nan mester bai dòkter si nan ta suponé ku tin algu. Ya e ta mira un poster su dilanti riba kua e misanan i komunidat homoseksual konhunto ta transmití e mensahe.

Investigashon
Inspekshon di Salubridat Públiko ta investigando e healingnan ku ta tuma lugá. For dje investigashon mester sali na kla si hendenan ku partisipá na e enkuentronan ei, enbèrdat no ta mèldu nan mes despues serka kuido di salubridat regular. Amsterdam a insistí serka minister Klink di Salubridat Públiko pa hasi un investigashon.