Awe alumnonan di MBO na Hulanda ta wèlga pa protestá kontra e kalidat pésimo di enseñansa ku e skolnan akí ta duna. Un rapòrt di inspekshon di enseñansa ta demostrá ku lèsnan na 64 skol di MBO ta muchu bou di nivel. E organisashon pa hóben ku ta siña un fishi, esta "Jongeren Organisatie Beroepsonderwijs", a organisá e wèlga pasobra nan ke pa gobièrnu hulandes intervení rápidamente pa remediá e nivel pésimo di skolnan di MBO.

Getson Sprok ta dosente di MBO na Albeda College na Rotterdam. E ta splika ku tin hopi problema na MBOnan, ku mucha no ta alkansá e nivel rekerí i ku skol no ta ofresé un bon enseñansa.

Rapòrt
Pero e no ta respaldá e rapòrt ku a sali, i den kua ta menshoná e kosnan akí. Sprok ta splika ku hende eksterno ta bin wak kiko ta pasando i drèi skibi un rapòrt, ku ta kontené informashon ku no ta kuadra ku realidat ni eksperiensia di esnan dén enseñsansa mes. Ta papia mashá di e kantidat di ora di skol. E diferensha entre e kantidat di ora ku alumnonan tin ku pasa na skol ta enorme. Na MBO ta 800 i piko, na Havo ta 1000 i piku. Sprok ta kere ku no mester lubidá ku muchanan di MBO ta kore hopi stazje kompará ku Havo i VWO, nan ta haña hopi práktika den gremio empresarial, e teoria nan ta siña na skol.

Wèlga
E echo ku dosente i lès ta kai afó tampoko ta kontribuí na un kalidat aseptabel den MBO. Ta demotivante pa sali kas, kore yega skol ku gana di haña lès anto pa tende ku sea e dosente no a blo òf no tin lès mas. A lo largu mucha no tin gana di bai skol mas.Sprok ta haña ta un bon inisiativa pa wèlga, i ku e alumnonan pa laga tende nan bos, ku nan ta rabiá ku e situashon pasó e muchanan no ta bai skol djis pa bai skol, sino pa siña pa un futuro pa mañan Dios ke nan tin un pan pa duna nan famia. E ta respaldá nan, nan tin derechi riba enseñansa superior i un bon trabou den futuro.

Rekomendashon
E ta kere ku lo ta bon pa pone un bon rooster, un bon jaarplanner i pa mantené un bon komunikashon entre kolega dosente i entre alumno i dosente. Ku bon komunikashon ku e studiantenan bo por traha mió. Ku struktura bo ta logra hopi, e orei e studiante sa unda e ta pará i kiko ta ward'é.