Kòrsou ta yama Lareina ayó ku kansion Atardi

Programa djaweps 3 di novèmber 2011

Sint Maarten ta e di kuater isla di gira real den teritorio karibense di Reino. Na nan yegada, gobernador Holiday i promé minister Wescot-Williams ta risibí reina Beatrix, prens Willem-Alexander i prensès Máxima na airopuerto di Philipsburg.

Seguidamente Lareina i su komitiva ta kòmbersá ku gobernador, minister presidènt i ku e ministernan di e pais outónomo. A reservá oranan di atardi pa bishitá instituto sikiátriko Mental Health Care Foundation, e plantashi di antes, Emilio Wilson Park, ku awendia ta área di naturalesa protehá i tambe Sundial School, kaminda ta ofresé formashon pa traha den sektor di hotèl, bar i restorant.

Na final di dia tin un festival kultural ku ta hiba komo tema kustumber i tradishonnan di Sint Maarten.

Bishita di Lareina ta tras di lomba pa Kòrsou. Ayera djárason, mientras ku nochi tabata serando i tononan dje piesa konosí Atardi tabata resonando, a klousurá bishita real ku develashon di un plaka konmemorativo na muraya di Fort Amsterdam. Un tradishon kustumbrá na okashon di bishitanan real. E biaha akí tabata trata dje promé bishita di Lareina na Kòrsou komo pais outónomo den Reino.

Lucille Berry Haseth spreekt het gezelschap toe

Lucille Berry Haseth ta dirigí palabra na esnan presente

Potrèt: Gijs van den Heuvel

Lingwista i poéta Lucille Berry-Haseth tabatin e honor di dirigí palabra na Lareina i su komitiva. El a enfatisá ku Kòrsou mester keda den Reino ulandes. El a papia dje relashon perturbá entre polítiko ulandes i kurasoleño, algun di e personanan en kuestion tabata sintá te dilanti.

Berry-Haseth ta kere ku kolonialismo no a generá kos malu so i ku ketubai Lareina ta di gran importansha pa mayoria habitante di Kòrsou. El a menshoná algun nòmber di kariño ku e monarka tin riba e isla, por ehèmpel 'Reina sonrisa'. Ku esei el a mustra indirektamente den direkshon di e movementu, ku ta empeñá pa independensha di Kòrsou komo un grupito marginá. Berry-Haseth a hasi un yamamentu na polítika pa uni forsa i a klousurá su diskurso ku: "Biba Hulanda! Biba Kòrsou!"

Helmin Wiels
Bishita di reina Beatrix, prens Willem-Alexander i prensès Máxima a bai kasi sin disonansia. Polítiko Helmin Wiels, lider di partido di koalishon Pueblo Soberano, tabata kasi 'su so den boso' ku rechaso dje bishita real. E tabata kier a entregá Lareina su deklarashon di independensha, pero su mahestat a pas'é pa minister Donner di Relashonnan di Reino, komo ku Lareina no por mete ku asuntunan polítiko. Wiels no a presentá mas den Staten tampoko pa sera konosí ku famia real.

Na yegada di Lareina por a mira algun pankarta na Willemstad, dirigí sobretodo kontra Hulanda. Pero e atheshonnan di simpatia i e aplousonan a predominá. Maske ku e oponentenan dje lasonan ku Hulanda i ku Kas Real no a 'show up', e impreshon general tabata ku porlopronto Kòrsou no ke sali for di Reino.