Miones di merikano djadumingu último a mira kon mama soltero Emily na Kòrsou porfin a haña un futuro kasá. A filma e programa ‘Bachelorette’ riba e isla.

E por a skohe entre tres hòmber ku ker a frei e. Na kabamentu ta e solteronan Arie i Jef a sobra. Den e transmishon live na emisora merikano ABC di djadumingu anochi Emily a bisa ku kua di e dos hòmbernan e ke kompartí su bida.

Na Kòrsou
Ta e di ocho be ku ABC ta transmiti e programa, pero promé be ku a film’é na Kòrsou. Tur hende ku a koperá na e programa pa e último transmishon a bini huntu den e plenchi di hotel Kurá Hulanda. Riba un pantaya grandi nan por a mira e dos hòmbernan duna tur ku tin pa konkistá Emily ku su kabei blònt.

Ku e programa Kòrsou a haña ‘exposure’ na televishon merikano. Por a mira kon Arie a bai kurandero Dinah Veeris pa konseho. Entretantu por mira imágen di Emily i su mayornan ta keiru riba e isla. Espesialmente e dos hotelnan di Kurá Hulanda a sali hopi riba pantaya.

Pa Danielle Duenas-Ernandes di ofisina di produkshon Touraçao Tourism Services tabata un reto grandi pa koperá na Bachelorette. “Mester a regla tur kos na último momento. E pèrmitnan pa filma riba kaya òf na playa. Mester a sera tur e lokashonnan. Nada no por a sali afó di antemano.”

Deklarashon
E trahadónan di produkshon asta mester a firma un deklarashon ku nan no tabatin pèrmit di papia ku niun hende tokante e resultado di e programa. Pa Daniella esaki tabata basta difísil. Ni su mes kasá e no por a bisa ku na final ta Jef lo a hinka rudia na Kurá Hulanda i pone un renchi na Emily su dede.

E opinionnan di e muhénan na Kurá Hulanda tokante e fórmula di e programa tabata varia. Na prinsipio Danielle tabata duda si bo por haña un kasá pa medio di un programa di televishon. Pero su mes eksperiensha ta ku bo por topa amor berdadero di un manera straño. Carla i Mida, ku tambe a sigui e progama riba pantaya grandi, no tabata di akuerdo. Segun nan un hòmber segun tradishon mester a pidi na kas seka mayornan si e por a sali kuné.

Bai Afrika
Pa Jef i Emily esaki no ta relevante mas. Nan a logra. Ta nan intenshon pa bai Afrika bai duna ayudo humanitario. Awor ta di warda mira si e miones di merikanonan ku a sigui e trámitenan rònt Jef i Emily lo haña smak di biaha pa Kòrsou tambe.