"Kòrsou ta ainda leu for di un Zwarte Piet rasista.” Solange Trinidad sa di e diskushon na Hulanda, pero e presidente di Fundashon pa nos Muchanan, ku kada aña ta organisá yegada di San Nikolas ku esaki no ta e kaso na Kòrsou: “I sigur no serka e muchanan. Nan sí no ta pensa blanku-pretu.”

Mas ku dies mil persona a bin yama djasabra mainta San Nikolas i su Pietnan bonbiní na Matheywerf na Otrobanda.  For di e lugá ei e hòmber santu ta kore ku su ayudantenan i promé minister di Kòrsou, Gerrit Schotte den direkshon di Plasa Brión. E públiko i San Nikolas ta haña un show grandi presentá ku baile, kanto i un brassband.

Fiesta hulandes
Presensia di promé minister na risibimentu di San Nikolas i e kareda despues ta kisas e último posibilidat pa promé minister pa yega asina serka di San Nikolas. Su gobièrnu ta bahando e supsidio pa e fundashon ku ta organisá yegada di San Nikolas bou di preshon di miembro di koalishon Pueblo Soberano, ku no ke mira nada di e “Fiesta Hulandes akí”. 

Un protesta anónimo ketu na e otro banda di Otrobanda na muraya di fòrti ta sostené e pensamentu akí. Riba un pankarta blanku no kompletamente legibel tin skirbí: ‘Fiesta di San Nikolas ta selebrashon di Rasismo’.

Nos kultura 
E públiko ku a akudí no ta ni wòri su mes ku esei. “San Nikolas ta parti di nos kultura i si bo no ke t’ei anto simplemente bo no mester bini tampoko”, asina un tenedó di stènt ku ta bende bibida pa mucha ta bisa. Un kliente ta sosten’é: San Nikolas ta un hòmber riku di Spaña i zwarte piet ta yud’é . E ko’i kèns di rasismo ei ta asina bobo.”

E tenedó di stènt meskos ku hopi otro hende  rondó di dje no ta na altura ku gobièrnu di Kòrsou ta bahando e supsidio di yegada di San Nikolas na Kòrsou pa finalmente kita tur e supsidio. Riba hopi komprenshon e desishon akí no por konta, pero tur hende ta konvensí ku e fiesta lo sigui otro aña manera nada no a pasa.

E tenedó di stènt ta dispuesto – i segun e tur su koleganan  - pa paga e fiesta for di nan propio saku. “Pero e fiesta akí no ta solamente komersial, e ta simplemente un fiesta pa mucha. Pues sinkuenta – sinkuenta, gobièrnu i komersio."

• Mas potrètnan riba e Facebook di RNW Aworaki
• Potrètnan riba Facebook di Bea Moedt