Amos Balentin a bira Rei di Tumba 2012. Su tumba ganadó ‘Un humilde piedra’a bira e tumba ku durante karmaval di e aña aki sin duda lo baila mas tantu. Den e tumba Balentien ta hasi un yamada na e selebradónan di karnaval pa pega na otro manera blòki di konstrukshon pa komunidat bira uní.

Amos Balentin despues di e tres rondanan preliminar a bira favorito pa e título. I djabièrnè anochi el a realisá su ròl di favorito. Emisoranan di radio lokal i media sosial a sugerí Balentin komo ganadó. Ora den e ronda preliminar di djárason el a trese su tumba, públiko den Curaçao Festival Center a bira loko. Amos Balentin a keda trankil i a konsentrá riba final.

Pa Balentin djabièrnè anochi no tabata dje fasil ei. Su konkurensha riba djaweps, nan dia di sosiegu, a tuma tempu pa puli nan tumbanan pa durante final nan zona hopi mas mihó ku den rondanan preliminar.

Konkurente
Hendrik de Windt, ku a bin defendé su título di aña pasá tabata un konkurente formal pa Balentin. Asina tambe Urvin Jano, Gilbert “Dibo” Doran, Igmar La Reine i Djuric Virginie. E kantantenan aki, den e sekuensha menshoná a finalisá na di dos te di sinku lugá. Hendrik de Windt no a sali den top 5 pero a haña premio si pa mihó letra. Gregory Colina a gana premio pa mihó areglo. ERA Outéntiko, e banda ku meskos ku aña pasa a akompañá e ganadó, a bira mihó banda.

Amos Balentin a bisa ku kuater aña pasá kaba el a kuminsá skibi letra pa ‘Un humilde piedra’. Kada miembro di komunidat ta un piedra di konstrukshon chiki pero ku hopi balor. Si tur e piedranan aki pone nan orguyo un banda i pega na otro, huntu nan ta bira un baranka masha fuerte mes.

Durante e konferensha di prensa despues ku e festival di tumba a kaba, promé minister Gerrit Schotte i minister di Kultura Lionel Jansen tanta  sinta kada banda di Amos Balentin. Schotte di ku el a komprondé e mensahe di Balentin bon kla.