E siman akí Kòrsou ta bon representá na Vakantiebeurs na Utrecht. E feria ta importante, ya ku fe yanüari ta kuminsá buk pasashi na Hulanda, pa destinashonnan di fakansi grandi den zomer. Curaçao Toeristen Bureau Europa tin un stènt grandi den e kòmpount karibense ubiká den edifisio di Jaarbeurs na Utrecht. E isla ke profilá su mes komo mas ku simplemente un destinashon vakashonal.

Ekspektativa di marketing director Edward Suares ta grandi pa 2012, apesar dje ekonomisashonnan i e krísis ekonómiko. Lo mester pone man na obra sí: "E konsumidó ta pendiente dje desaroyonan. Lo kosta hopi energia i kreatividat pa konvens'é p'e skohe Kòrsou."

Trato direkto
Último añanan 'trato direkto', kédesir aserká e turista direktamente, a duna bon resultado. Suares ta kere ku maske sifranan definitivo pa aña 2011 no a drenta ainda, e kantidat di turista for di Oropa a keda mas o menos meskos. Lo kontinuá ku e strategia ei i lo tin di refors'é tambe.

Na Oropa ta paisnan manera entre otro Alemania i Bélgika ta merkadonan kresiente, mientras k'esnan skandinavo i esnan mediteránio manera Spaña i Portugal a bai atras aña pasá. Ta kalkulá ku un total di 164.000 turista oropeo a bishitá Kòrsou na 2011.

Mas ku fakansi so
Kòrsou mester profilá su mes mas komo destinashon kultural, komo un sitio kaminda turista por deskubrí mas kos. "Mester laga e turista realisá djun manera mas intenso, ku e isla ta mas ku un destinashon pa pasa fakansi so."

Suares ta atmití ku promoshon dje isla karibense lo bira mas trabahoso na Hulanda, pero merkado turístiko no ta saturá: "Pedido tei ainda." Pero ta bai tin mester djun maneho diferente pa alkansá grupo meta nobo. "E kompetidónan no ta sinta ketu tampoko."