Empresario di hóreka na Kòrsou pronto lo por ferwacht kòntròl severo kaminda GGD i polis lo ta implakabel si higiena i seguridat di e empresa ta malu. Asina Osfrien Offerman, hefe suplente di Asuntunan Tékniko i Higiena, a laga sa.

Motibu ta e situashon insoportabel kontinuo seka diferente empresa di hóreka manera snèk, trùk di pan i bendedó di pan drechá. Aña pasá so kaba inpekshon di salubridat durante di kòntròl a sera mas ku mitar di tipo di empresa asina pa motibu di mal higiena of sirkunstanshanan no seif.

Un chèns mas
E kurso di urgensha di higiena básiko ku gobièrnu ta ofresé grátis e luna aki mester trese un solushon. “Ku esaki nos ta duna nan un chèns pa drecha”, segun Offerman. “Despues di esaki nan no por skonde tras di ignoransha i e ora ei si a kaba si nan asuntunan no ta na òrdu.

Kiko si i kiko nò
Durante e kurso básiko di dos dia e partisipantenan ta siña kiko si i kiko no mester hasi den limpiesa, desinfektashon i friamentu di produkto. Nos ta duna nan instrukshon ku tin be parse opvio, pero ku no ta apliká den tur kushina di Kòrsou. Pensa por ehempel riba tabla di kòrta apart pa berdura i karni, esaki berdaderamente ta mandatorio”, Offerman ta konta. “Tambe nos ta yuda nan tarha un programa di kòntrol i enfoke di higiena i seguridat.”

Na midi
Ta duna e kurso den koperashon ku GGD, brantwer i polis pa asina trata tur tópiko ku ta esenshal pa un empresa di horeka seif. “Ademas nos a traha un kurso na midí pa doño di snèk, doño di trùk di pan i bendedó di pan drechá pa perkurá ku e teoria ta apliká mas miho posibel na práktika”, Offerman ta splika.

Shuatamentu
No opstante e situashon prekupante ku Servisio di Asuntunan Tékniko i Higiena a topa na un gran kantidat di empresa chikí di hóreka, e kantidat di shuatamentu riba e isla no ta haltu. “Durante un zomer promedio na Scheveningen na Hulanda tin mas notifikashon di shuatamentu seka servisio di inspekshon di alimento i merkansia ku den henter un aña na Kòrsou”, segun Offerman. “Ta posibel ku esaki ta pasobra yu di Kòrsou ta hasa tur kos bon hasá i kasi no ta kome piská kurú.

Marka di inspekshon
No ta un kurso básiko so lo tin. Ministerio di Salubridat tin idea pa ofresé kurso kontinuativo gratis pa empresario di hóreka. Den e kurso nan lo siña mas di mantenshon di freskura di nan produkto i di funshonamentu di mikrobio.

Despues di e kursonan nos lo evaluá i determiná un norma. A base di esaki den futuro nos por parti marka di inspekshon pa asina e konsumidó tambe sa ta kiko ta kiko.