Futbolista seka e klup ingles Manchester United. Esei ta e soño grandi di Jürgen Locadia di edat di 15 aña. Aktualmente e ta hunga pa tim B1 di Willem II, e klup di promé divishon di Tilburg. Pa e motibu aki henter su famia mester a muda for di Emmen na Drenthe, kaminda el a nase.

A selektá e futbolista hóben pa e selekshon hulandes na Weganan di Rèino. E echo ku nan a skohé tabata un sorpresa p'e ya ku e no por a partisipá na un di e weganan di selekshon komo ku el a bira malu. Ta p'esei el a bira kontentu ora el a tende ku e por bai Aruba.

Jürgen ta hunga futbòl for di edat di sinku aña. "Mi ta drumi i lanta ku futbòl", e futbolista hóben ta konta na su kas na Tilburg. Entretantu e ta un hunga un wega di futbòl riba pantaya. Su mama Nathaly Locadia ta para wak e ku hopi kariño. "E no por sin e wega ei. E ta bai kune den su ekipahe di man ora e sali pa Aruba pa Weganan di Rèino.

Internashonal
Jürgen ya tin basta eksperiensha internashonal. El a hunga pa Jong Oranje, pa hubentut bou di diesinku aña. Ku e tim aki el a hunga futbòl na diferente pais Oropeo. I na mei di e aña aki na Roma ku e klup di amatùr Sarto, kaminda aña pasá a proklam'é komo e futbolista mas talentoso. Tòg e tin gana di bai Weganan di Reino na Aruba. Su mama ta di Kòrsou i ainda su tawela ta biba einan. Lo e tábatin gana di a hunga futbòl na Kòrsou, pasobra hopi famia di parti di mama ta biba ei. Pero su abuelo a bisa kaba ku e ta bin Aruba pa mira su ñetu hunga futbòl.

Mama Nataly ta bisa ku Jürgen a sali pa su welo ku su talento pa futbòl. Su opa tabata un treiner i futbolista konosí na Kòrsou. Jürgen mes ta kere ku e amor pa futbòl ta bin di su tionan. "Semper nan tabata pasa buskámi pa bai wak futbòl di kaya i wega di FC Emmen, kaminda mi tio Jerry tábata hunga futbòl."

Karera
E karera di Jürgen ta kuminsá na Emmen. Promé seka VV Bargeres, despues e el a hunga pa FC Emmen kaminda Willem II a skout e. Jürgen ta soña ku un karera internashonal. Pa esaki e ta trein sigur dies ora pa siman. Tin be e mester trein den ora di skol. Koning Willem II College ta tene kuenta ku esaki.

Anke mama Nataly ta apoyá su yu hòmber mas tantu posibel pa realisá su soño, e ta haña ku e mester di un edukashon sólido tambe. Ta p'esei skol i futbòl ta di mes importansha p'e. Pero ainda Jürgen no tin problema ku esaki. Otro aña e ta pasa èksamen i ora e kumpli 16 aña na novèmber e ta spera di firma un kontrakto profeshonal seka Willem II.