Buro Vijn di Friesland ta bai duna konseho riba terenu di maneho urbano na Boneiru i Sint Eustatius. E ofisina konsultativo komersial pa planifikashon urbano ta traha riba enkargo di kolegionan insular. Aki un aña i mèi e mester pone un rekomendashon riba mesa tokante e mió manera di struktura interno pa e islanan den futuro. Ku sufisiente espasio pa biba, traha i pa e naturalesa presioso.

Jur van der Velde, kende ta enkabesá e proyekto a kuminsá ku un bishita di trabou di tres dia na Boneiru. E no tabata konosé Antia i el a keda agradablemente sorprendí ku bunitesa di Boneiru: "Ta un isla fantástiko i kompletamente diferente di Waddeneilanden serka nos manera Texel i Vlieland, kaminda nos ta traha tambe." Buro Vijn lo traha dos plan di destinashon urbano: un pa Kralendijk i Rincon, un pa sobrá teritorio insular. 

Balanse
E tenshon di tur tempu entre di un banda, e deseo di kresementu ekonómiko i di otro banda, kuido di naturalesa i di medioambiente ta hunga un ròl den strukturashon di Boneiru. "Tin hopi desaroyo riba e isla i ta un reto pa balansiá e plannan", segun Van der Velde.
 

Durabilidat
Komo kualidatnan spesial e konsehero riba terenu di ordenamentu urbano ta menshoná makurá i e ekologia singular di Boneiru. "Mester bai ku mashá kuidou ku nan." Fuera di esei e ta mustra riba e echo, ku e isla a duna preferensha na desaroyo duradero, kaminda kresementu kontrolá ta pará sentral. Dia 3 di sèptèmber gremio turístiko boneriano a tene un reunion na Den Haag den kuadro di turismo durabel.
 

Polítika
Jur van der Velde ta enfatisá sí ku su papel ta konsultativo so i ku finalmente ta polítika ta disidí. "Ta e isla ta traha e plan di destinashon ." Medio sèptèmber lo e hasi un bishita similar na Statia den kompania di su koleganan di Buro Vijn. Pa trabou di konsulta su ofisina ta kolaborá ku Fundashon Carmabi na Kòrsou.
 

Finansiamentu di e proyekto akí ta bin di fondonan di USONA, un fondo ulandes di desaroyo pa proyektonan na Antia ulandes.
 

Skucha Jur van der Velde den kòmbersashon ku kolega Tanja Fraai.