Despues di tabata aktivo mas ku 33 aña den politika di Boneiru, Jopie Abraham a tuma e desishon pa no pone su mes disponel mas komo lider politiko di Partido Demokratiko Boneriano (PDB) pa próksimo elekshon. For di último elekshon Abraham a pone su funkshon di lider politiko na disposishon di partido. Aworaki definitivamente lo e no partisipá komo lider politiko den e elekshon benidero.

Den konsulta ku frakshon i direktiva di Partido Demokratiko Boneriano (PDB) a keda palabrá, ku pa fin di e siman akí lo trata liderato nobo di partido mañan djaweps den konseho di partido. Djasabra awor lo nombra un kabesante politiko nobo den un reunion general di partido na su sede na Entrejol.

E intenshon ta pa banda di un lider polítiko nobo eligí tambe un direktiva nobo pa Partido Demokrátiko Boneriano. Di e forma akí ta kuminsá mésora ku un kampaña pa elekshon di konseho insular, ku lo tuma lugá dia 2 di mart di otro aña.

Di kurason
"Mi ta sumamente agradesido na tur esnan ku a dunámi sosten i apoyo durante mi karera polítiko, ku a kuminsá den añanan setenta i a dominá kasi henter mi bida komo adulto. Tabata un honor pa mi por a sirbi mi pueblo den varios funkshon públiko riba nivel insular i federal", palabranan di agradesimentu di kurason di Jopie Abraham, un di e figuranan mas prominente, pa no bisa pilá di mundu polítiko di Boneiru.

Oponente na Hulanda
Eric Molina, boneriano bibá na Hulanda, pero ku kurason i mente ainda na Boneiru, ta masha kontentu ku e echo ku Abraham ta bandoná polítika. Es mas: p'e e kos akí mester a sosodé fo'i masha ten pasó 'mi no ta mira e bon resultado pa Boneiru.'

De paso Molina a ekspresá su malkontentu ku otro figura prominente den komunidat na Boneiru, esta Ramonsito Booi, kende tambe a sali for di polítika un ten pasá. Molina ta konvensí ku lidernan boneriano ta keda traha tras di kortina, maske nan anunsiá ku nan ta disparsé for di esenario polítiko. 'Ta nan ta keda dirigí, pasó e hendenan akí tin un hamber di poder asina grandi, nan ta hasi uso di tur sorto di medio pa nan realisá nan metanan', segun Eric Molina den deklarashon pa Aworaki.

Skucha un entrevista di Désiree Martis ku Eric Molina