'E dos piedranan den sapatu’ di Kòrsou, Helmin Wiels i Jacob Gelt Dekker ta haña ku Jamaloodin, minister di Finansa den gabinete Schotte mester entregá su retiro pa evitá daño na imágen di e koalishon.

Lider di Pueblo Soberano i doño di Kurá Hulanda ta reakshoná ku esaki riba notisia di Wall Street Journal, kaminda tin pará entre otro hefe di number i ruman di Jamaloodin, ‘Robbie’ Dos Santos lo tabata metí ku loteria ilegal i labamentu di plaka. Dos Santos  ta pasa pa ún di e gran finansiadónan di partido di gobièrnu MFK di Gerrit Schotte. E partido ta desmentí esaki fuertemente.
 

Maldishoná
For di 2007 kaba Gelt Dekker a hala atenshon tokante labamentu di plaka na Kòrsou, pero el a haña poko oido e tempu ei. Pa e motibu ei nan a maldishon’é.
 
“Mi a haña hopi tep di persona ku nan mes no tabatin kurashon di trese e asuntu akí dilanti, pero ningun hende den polítika kier a kere esei”, asina Gelt Dekker ta bisa. En bes di esei diputado di e tempu ei, Charles Cooper, a deklará mi komo ‘Persona non Grata’.

Segun e komersiante ta mihó pa Kòrsou si Jamaloodin dal un paso patras, en todo kaso te ora e investigashon di Ministerio Públiko yega na su fin.” E posibel konflikto di interes ta demasiado grandi.  Asina e no por funshoná. Ademas esaki ta tacha integridat di gobièrnu. 

Desensia Polítiko
Segun Wiels aktualmente e minister tin tur sorto di aparensia kontra dje pa medio di su relashon familiar ku e sospechoso Dos Santos i su resiente biahenan  ‘vago’ pa Merka. “Ta duna muestra di gran desensia polítiko”, segun lider di P.S., pa un polítiko bandoná e área ora nan tres’é den relashon ku práktikanan kriminal. Si tabata un hende di mi partido, ya pa basta tempu lo mi a pon’é un banda,” di akuerdo ku Wiels.

Apesar di esei e polítiko akí no ta sintié yamá pa insistí riba retiro di e minister serka e miembronan di koalishon: “Jamaloodin ta un minister di MFK, pues ta e partido ei mes mester planta su bonchinan. Esei sí mi no por hasi pa nan.”