Tur djasabra e programa 'Aki na Hulanda' di Radio Nederland Wereldomroep ta pone un persona òf instansha 'Den Spòtlait'. Awe Isora Leal ta den spòtlait. Isora Leal ta un dje integrantenan dje grupo di baile Exspreshon Kultural di Almere. E grupo di baile a haña un sla duru durante e drama ku a tuma lugá 30 di aprel, riba Dia di La Reina na Apeldoorn. Ayera ta eksaktamente seis luna ku e insidente a tuma lugá. Un dje integrantenan, Wilfrido Plantijn, a pèrdè su bida i diferente otro a sufri leshonnan serio.

Bida di Isora Leal a kambia drástikamente. Seis luna pasá e tabata un señora independiente i drùk ku su trabou i famia. Awor esei ta kompletamente otro. Leal: "Awor mi ta dependé di hende. Mi ta dependé di mi famia i tur otro ku ta rònt di mi. Mi ta sintimi laf, pasobra tin kos ku mi tabata hasi ku mi no por hasi mas. Mi mes no por drenta outo i sali bai."

Revalidashon
Tantu Isora Leal komo su ruman muhé Oneilla Leal i un otro integrante di Ekspreshon Kultural, Rudsel Haddocks, ta den e proseso di revalidashon. Isora Leal a haña leshon serio na su pianan i kònchi di kurpa. Un biá el a operá na hòspital. E tabata den ròlstul i awor ta kana ku krùk. Dos biá pa siman e ta bai un sentro di revalidashon. Apesar di tur loke a pasa Isora Leal ta positivo i optimista, loke ta yuda su proseso di rekuperashon, segun Leal. "Tin bes mi ta puntra mi mes si ta den un pelíkula mi ta. Pasobra ta parse ku no ta real. Te ainda mi no por komprondé ku algu asina a pasa. Mi no tin noshon ainda di loke a pasa ku nos."

Rabia
Hopi hende ta puntra Isora Leal si e tin rabia riba e malhechor responsabel pa su situashon. Pero e no ta sinti rabia. "Mi no sa dikon, pero nunka mi no a sinti rabia ni odio kontra e persona ei."

Isora Leal a konta mas aleu Den Spòtlait ku despues dje aksidente el a haña bishita di famia di Kas Real. E otro integrantenan ku a sufri leshon tambe. "Nan a bishitá nos un biá, pero despues nos no a tende nada mas di nan. Mi a tende di mi ruman ku nan ta puntra pa nos si, pero no tin kontakto direkto."

Isora Leal den studio den kòmbersashon ku Belkis Osepa i Johan Oldenboom