Awe, djamars 10 di yanüari Konsulta Interparlamentario di Reino (IPKO) ta kuminsá na Sint Maarten. Den e próksimo kuater dianan di deliberashon entre parlamentunan dje paisnan di Reino, lo papia entre otro riba transporte entre e islanan i riba salubridat públiko i Statüt. Promé ku esei, miembronan di Staten-Generaal a hasi bishita di trabou na e islanan karibense di Reino hulandes.

A dediká atenshon spesial na e munisipionan ekstraordinario di Hulanda, o sea Boneiru, Sint Eustatius i Saba, mió konosí komo islanan BES. Cynthia Ortega Martijn, miembro di Tweede Kamer (parlamentu hulandes) pa partido ChristenUnie ta kontentu ku awor su koleganan por mira e problemanan n'e islanan chikí ku nan mes wowo. Ta trata dje fayo i pegonan ku e parlamentario a deskribí den su rapòrt tokante situashon na BES.

Ortega-Martijn a keda soprendí p'e echo, ku hopi hende n'e islanan tabata sa eksaktamente kon a reakshoná na Den Haag riba e rapòrt. Ma falta hopi kos pa drecha ainda, segun Ortega-Martijn: "Pa bisa frankamente, den hopi kaso no a hasi nada ku e proposishonnan." Ta p'esei ta bon ku e koparlamentarionan tambe ta mir'e kos akí, pa nan komprondé ki ta pasando, 'pasó hendenan ta skonde ku nan ta pober, sobretodo e penshonadonan anto ta resultá ku nèt e produktonan di primera nesesidat ta demasiado karu i no ta stimulando ekonomia tampoko.'

Negativo ta eklipsá positivo
Ortega-Martijn no ta ninga ku tin kambionan positivo tambe for di momento di desmantelashon di Antia na 10-10-10, manera material grátis di instrukshon i un seguro médiko general. Ma ki ta sosodé? E eksperienshanan negativo, manera oumento di preis i e burokrasia ku baimentu afó pa motibunan médiko ta eklipsá esnan positivo.

Parlamentario Cynthia Ortega-Martijn ta insistí ku 'mester bin ku un plan di invershon, un 'masterplan' di polítiko, spesialista i di profeshonalnan pa kada un isla', algu ku sigur sigur lo e bolbe trese dilanti durante e konsulta interparlamentario, o sea IPKO na Sint Maarten.