Sekretario di estado hulandes Ank Bijleveld di Relashonnan den Reino i promé minister arubano Nelson Oduber ta di akuerdo tokante un manera pa komprobá iregularidat gubernamental na e isla. Lo no tene un investigashon di korupshon manera Bijleveld a primintí Tweede Kamer den un karta, pero lo formulá un plan di enfoke pa abusonan real.

E diferensha entre un investigashon i un plan di enfoke ta ku sobretodo nos ta hasi'é huntu, asina e sekretario di estado ta bisa. Promé minister Oduber ta rekonosé ku Reino ta hunga un ròl den funshonamentu di demokrasia i estado di derecho. "Esei ta nifiká ku mester hasi un investigashon di echo pa loke ta trata esei."

Investigashon independiente
Ainda lo 'studia' e puntonan ku Bijleveld a menshoná den Tweede Kamer, asina e ta enfatisá. E puntonnan ta por ehèmpel Ministerio Públiko i polis. Huntu ku Aruba lo formulá un método investigativo; no ta konosí ken lo ehekutá esaki. "Un investigashon di echo independiente tambe ta importante pa Aruba, segun e mandatario, pasobra e ora ei ta klaro kua ta e puntonan ku mester mehorá.

Tweede Kamer ke pa e resultado dje investigashon keda kla denter di seis luna. E plan di enfoke lo no mester haña retraso, segun Bijleveld. "Si nos formulá e preguntanan dje investigashon bon, ehekushon lo tuma mei aña di tempu despues di vakansi di zomer."

Palabrashonnan
Riba e pregunta dikon mester hasi un investigashon na Aruba i no na Antia, Bijleveld a kontesta ku na Antia ta tuma lugá e proseso di restrukturashon. "Den esaki nos ta hasi palabrashonnan tokante bon gobernashon, Ministerio Públiko i polis. Na Antia nos a konstatá algun kos i tabatin rumornan. "Mester studia tur esei."