Manera kos ta pinta e investigadónan ku tin di atendé ku abuzu seksual den Iglesia Katóliko na Hulanda, tin bast'un pida trabou pa hasi.

Ta asina ku abuzu seksual no a keda limitá na kombento na 's-Heerenberg: el a tuma lugá na institutonan katóliko rònt Hulanda. Awor tin basta hende ku ta mèldu abuzu ku a tuma lugá na Eikenburg tambe, un internat karo pa yu di diplomátiko i mayor riku. Esaki a sali na kla den un investigashon di Wereldomroep i NRC. Na Eindhoven tambe tabatin kasonan di abuzu seksual.

Dolf tabatin dies aña ora a abuzá di dje pa promé biaha na internat Eikenburg na Eindhoven, asina e ta konta. E kos a sosodé poko despues ku el a yega e lugá. E ta mustra riba líder di su grupo, un bruder katóliko komo malechor. 'Despues di un par di siman a lantámi mei anochi riba sala di drumi. E bruder a bai ku mi. Mi mester a hinka rudia. A pone diesinku deiken riba mi. Asina mi a pasa tres kuart'i ora ta soda den e posishon ei. Djei mi mester a satisfasé e bruder. E kos ei a sigui ripití práktikamente tur siman anto henter un aña. Na tur sorto di manera. Komo mucha bo no tabata sa kiko ta pasando.

Presishon militar
E tempu ei Eikenburg tabata un di e internatnan mas karo di Hulanda, bunita situá den boske serka di Eindhoven. Dolf (ku awor tin 63 aña) tabata na e internat di fin di aña 1956 te 1958. E ta deskribí líder di su grupo komo un hòmber haltu, gròf, ku tabata aktua di un manera agresivo i tabata eksihí presishon militar di e mucha hòmbernan. E tabata ranka kita paña dje kamanan pa kontrolá si a dobla e laken di abou hal'é steif p'e keda lisu. Den komedor e tabata ehersé e mes tipo di teror. 

Brudernan di Amor
Den e kapia di siglo 19 i e edifisonan anekso e Brudernan di Amor tabata duna lès na masoménos 350 alumno ku tabata interná ei. E brudernan di e òrdu ku ramifikashon rònt mundu, ta pone amor pa próhimo na promé lugá. Nan tabata dirigí nan mes tradishonalmente riba kuido di hende pober, enfermo i grandinan. Pero ora tabata trata e mucha hòmbernan di Eikenburg, e brudernan tabata hiba un régimen di man duru. Si e mucha hòmbernan no komportá nan mes bon, e dosentenan tabata duna nan un 'karchi blou', ku ta' pone ku nan no por a bai kas e fin di siman ei. Dolf ta bisa ku e líder di e grupo tabata hasi uzo di esei. 'Despues el a purba di violá mi tambe. E tabata asina grandi i fuerte. Su mannan tabata kubri henter mi kara.'

Sensura di karta
Mayoria di biaha Dolf tabata bai bishitá su famianan den fin di siman komo ku su mayornan tabata den eksterior. Su tata tabata diplomátiko. E kombinashon di soledat, inseguridat i sinti falta di kas tabata e kos mas pió, asina Dolf ta komentá. 'Mi mayornan tabata masha leu mes. Mi no por a bai niun kaminda.' No tabata un opshon tampoko pa mèldu e abuzu den un karta, pasó e brudernan tabata kontrolá tur karta di i pa e alumnonan. Esei ta para literalmente tambe den un foyeto di propaganda di Eikenburg di e tempu ei. Di e forma ei tabatin mas mucha hòmber ku mester a akudí pa amor serka e brudernan: yunan di direktor di kompania, dentista, i gerentenan di Philips den eksterior.

Atmishon obligá
E pader superior na nivel di provinsia di Brudernan di Amor, Ton van Heugten (74) promé no kier a reakshoná riba e asuntu. 'Mi sa loke ta pasando pero mi no ta reakshoná.' E relatonanan tokante e bruder ku lo a abuzá di Dolf? 'Mi sa di nan. Pero si algu a sosodé e ten ei, mi no sa.' Van Heugten ta bisa ku a manda e bruder na un klínika sikiátriko.' Ei nan a deklar'é komo pashènt sikiátriko.' No a investigá posibel víktima di dje.

Nèshi
E kamindanan ku palu di roble ku ta duna dushi sombra na Eikenburg ta tapa masha miseria, asina un investigashon di Wereldomroep i NRC Handelsblad tokante abuzu den internat i seminario ta indiká. Di e mas ku 100 kaso di abuzu ku a mèldu i ku Wereldomroep i NRC Handelsblad a investigá den delaster dos simannan, Eikenburg ta bini dilanti komo un nèshi di abuzu. Diesun èks alumno ta konta kon a abuzá i matratá nan i otronan repetidamente. Esaki lo a tuma lugá entre 1956 i 1983. E èks alumnonan ta akusá nuebe bruder i un bruder laiko. Na tur tabatin masoménos sinkuenta bruder ta traha na e internat.

Violensha físiko
No ta tur alumno tabata yu di hende ku moda. Henk Overdevest i su dos rumannan, yu di un agrikultor ku ta kultivá bulbo di flor mané tulipan na Noord Holland, a bai Eikenburg na 1968. Henk ta konta ku su mama tabata labil, ku e no tabata por ku su yunan i tabata bati nan hopi. El a sali di e situashon insigur akí na su kas i yega Eikenburg den zèsde klas di skol básiko.

E problemanan a start práktikamente umbes. E grupo di alumno nobo a kana subi un stupi haltu ora un dje mucha hòmbernan a hasi un remarke frepòstu. Un bruder a dal e masha duru mes na su kabes. E mucha hòmber a kai for dje trapi di piedra, dal abou masha duru mes riba kaya. Niun hende no a intervení. E mucha hòmber a lanta para atrobe ku difikultat. El a yora hopi naturalmente el a grita yora.'

Intimidashon
Hopi biaha e krueldat tabata di karakter seksual tambe. Espesialmente e mucha hòmbernan ku no tabata bai kas den fin di siman tabata eksperenshá esei. Overdevest: Un djasabra atardi nos tabata hunga biar. Net un di e mucha hòmbernan tabata prepará su mes pa e bai stot e bala ku e tako, ora e mes bruder a kana yega para tras di e mucha hòmber. El a pusha e mucha hòmber kontra e mesa di biar, primi su kurpakontra e mucha i kuminsá move baibin. Henk ta konta kon e bruder a satisfasé su mes ku un kara tur trosé i halanda rosea pisá. E alumno mester a soportá e kos akí numa. 'E mucha hòmber ei tabatin masha miedu mes. E no tabata sa ku ki kara e mester a wak.' Demas mucha dje grupo no a hasi nada, nan tabatin miedu di represaya. 

Dònder òp
Henk a sera amistat ku un otro guia, un bruder laiko ku tabatin masoménos 19 aña. E guia a invitá Henk pa bin serka dje den su kamber pa nan papia. 'Nos a sinta kombèrsá te lat ei, radio tabata toka i el a dunámi un likùr sut.' Despues esei a resultá di ta introdukshon pa un avanse seksual. 'Mi tabata drumí anochi den mi kama i m'a spièrta. Un hende tabata mishi ku mi órgano seksual. Mi a push'é un banda. Despues e guia a bolbe purba un biaha mas, pero e biaha akí di un forma mas agresivo. Atrobe Henk ta push'é. 'Poko despues mi a tende di un parti den e sala di drumi un mucha hòber ku no tabata tuma nada na man di niun hende grita : Dònder òp, no mishi ku mi kurpa.' Su siguiente dia su mayornan a bini i nan a kita e bruder mésora for di trabou.'

Koutela
E akusashonnan di Dolf i Henk ta dos ehèmpel numá di un problema struktural. Testimonio di otro èks alumno ta hasi aseptabel ku na añanan sesenta i setenta tabatin masha hopi kaso di abuzu. Un èks alumno ku a duna añanan pasá kaba keho di abuzu serka pader superior Ton van Heugten ta rekòrdá e tempu ei ku rabia. 'El a bisámi ku mi storia no por tabata bèrdat.' Asina mes resientemente e èks alumno a haña un karta tòg di Van Heugten ku un formulashon masha kouteloso: 'Nos lo lamentá masha tantu mes si ta asina ku a surgi un insidente un ten na nos internat.'

Konsuelo
Delaster añanan, promé ku e internat a sera su portanan na 1996, e tabata un skol pa mucha hòmber i mucha muhé. Kada alumno tabatin su mes kamber. E ambiente tabata ménos severo. Pero e abuzu no a stòp sí. Un hende muhé di 42 aña di Deurne, pegá ku Eindhoven, ta deklará ku for di tempu ku e tabatin 13 aña -di 1980 te 1983- un bruder di 30 i piku aña a abuzá di dje. Awendia e señora ta kasá i e tin dos yu. Ta pa e motibu ei e ke keda anónimo. E bruder lo a konsol'é pasó e tabata sinti falta di kas. Pero esei a bin resultá den sèks.

Ora e señora su tata a bin haña sa, i a menasá di bai polis, a trasladá e bruder pa un otro internat di Brudernan di Amor, esta Sint Jozef na Roermond. Aktualmente e ta un di e kuater miembronan di direktiva nashonal di e òrdu di bruder.

Konfeshon
E brudernan di Amor ta biba ainda na Eikenburg. Den promé instansia e pader superior na nivel provinsial, Van Heugten ta nenga di papia di e akusashonnan. Pero den un di dos kombèrsashon na telefon e ta atmití ku e miembro di direktiva 'tabatin algu ku e mucha muhé ei.' Bou di yoramentu e bruder ei 'a kaba di konfesá ku el a hasi e kos ei.'

Despues di kombento Don Rua na 's -Heerenberg ta parse ku internat Eikenberg ta e di dos lugá kaminda tabata reina un kultura di abuzu. En bista di e kantidat di kaso ku a mèldu serka 'Ayudo i Derecho', probablemente lo sigui mas kaso. Hulanda por okupá un lugá den e fila kresiente di pais kaminda rápidamente ta revelando kasonan di abuzu ku a tuma lugá pa basta tempu na institutonan di iglesia.