Minister di Salubridat Públiko Constancia djamars mèrdia 3 di yüli ofishalmente a habri Instituto di Salubridat Públiko di Kòrsou (VIC) na Otrobanda. E instituto tin komo meta investigá i registrá salubridat di pueblo di Kòrsou.

E tres añanan ku ta bini e instituto, ku ta keda den e Sentro Akadémiko Sint Martinus na Molenplein, lo okupá su mes espesialmente ku tres proyekto grandi. Asina e instituto lo hasi un investigashon nashonal di salubridat públiko na Kòrsou i lo warda tur informashon tokante salubridat den un banko di dato nashonal. Tambe e instituto tin intenshon di lansa un website di informashon na sèptèmber.

Enkuesta Nashonal di Salubridat
“Te aworaki maneho di salubridat públiko semper tabata basá riba e asina yamá ‘best guesses’na lugá di sifra i echo konkreto”, trahadó di maneho Soraya Verstraeten ta konta. “Riba pregunta manera ‘kiko ta e tòp tres di kousa di morto òf enfermedat na Kòrsou’ ainda nos no tin kontesta.”

“Tampoko nos no sa ki prioridat mester duna sierto enfermedat i si inisiativa di maneho ku nos tin kaba ta bèrdaderamente efektivo. Pa tur e motibunan aki investigashon ta masha importante.” VIC ke ehekutá e investigashon na sèptèmber pa medio di enkuesta.

“Nos ta koperá ku Ofisina Sentral di Statistik (CBS). Nan lo pasa di porta pa porta pa buska dato. Despues e instituto lo analisá e datonan. Tur esaki lo tuma dos luna. Den promé mitar di 2013 lo publiká e resultadonan.”

Banko di dato
Banda di e Enkuesta Nashonal di Salubridat e instituto lo lanta un asina yamá Curaçao Health Information System’. “Den e banko di dato aki nos ke warda tur sifra importante tokante nos salubridat públiko”, segun Verstraeten. “Aktualmente hopi di e datonan aki ta plamá den banko di dato di SVB, BZV, seguradó i hòspital.”

“Pa haña un bista kuantu i kon hende ta hasi uso di kuido médiko tin hopi nesesidat di un banko di dato ku sifra kla. Ku e informashon aki nos por duna prioridat na e problemanan di salubridat grandi riba e isla i midi kiko ta e efekto di intervenshon.”

Posishon independiente
VIC mester ehekutá e proyektonan aki, i no GGD pasobra esaki, segun Ministerio di Salubridat Públiko, ‘ta henteramente otro kos’. “VIC ta independiente. Bo por kompará státùs di e servisio ku esun di Inspekshon di Salubridat. Tin un trayekto di legislashon ta kore kaminda tin pará ku e instituto di investigashon mes por determiná kon e ta hasi investigashon i kon e ta publiká e resultadonan. Esaki ta masha importante pa garantisá nos independensha sientífiko. Bou di GGD esaki no ta posibel.”

Segun ministerio Inspekshon di Salubridat Públiko tampoko no ta esun ku mester hasi e tareanan di VIC. “For di oktober 2010 a parti Salubridat Públiko den Investigashon, Maneho i Ehekutashaon. Inspekshon ta kai bou di ehekutashon, ke men nan no por hasi investigashon sientífiko.”